ЉУБОМИР КОСТОВСКИ
Го гледав главниот дневник на МТВ во 19.30 часот, навистина со интерес за една работа – како на јавниот сервис ќе се третира приемот на Радмила Шекеринска, по повод нејзината нова функција.
Најпрвин, темата не беше најавена. Добро, одиме понатаму.
Саемот на вино во Белград го следат дури две новинарки. Содржината на прилогот беше иста како и во 17 часот. Прилогот траеше половина дневник, а во него немаше ниту еден кадар од средбата Вучиќ – Мицковски, ниту Вучевиќ – Мицковски, а беа најавени со свечен тон. Само неколку реченици што не откриваат ништо што би оправдало одење на толкава екипа на саем кој не може да го има значењето што му го придаде информативната редакција. Барем да имаше разговор со некој навистина голем извозник од Македонија. Политичкото значење веќе споменавме – без илустрација, како да се работи за некаква сикретна средба во уште посикретни простории. Вел над тајната!
Ајде, дојде на ред приемот на Шекеринска, после 19:45 часот. Хм, имаше таму само изјава на присутната претседателка на државата од две реченици во кои таа ја издвои својата „улога во лобирањето“. Рече дека во вакви ситуации не е битен индивидуалниот квалитет, туку моќта на лобирањето. Потоа говореше претседателот на Собранието со неколку реченици и во ист стил. Можеме да замислиме како во НАТО легнале на нивното инсистирање да имаме генерален секретар на таа организација.
И побитно – немаше слика на Шекеринска! Кој го правел приемот, кои луѓе учествувале таму, всушност, имало ли луѓе? Двете осамени изјави, споменати, беа снимени некаде во антратето. Можеби требало и надвор на паркингот, ама задоцниле снимателите.
Инаку, да не заборавам, приоритет во Дневникот, барем во редоследот, секако по уредувачки избор (Фиданка Стоевска), го имаше протестот што градоначалникот на Шуто Оризари Дудуш го направи пред Градското собрание, што другите медиуми го прогласија за екстремно неуспешен со одзивот. Битно, во таа вест „студиозно“ визуелно е прикажана на тој начин што нема шанса да проѕрете колку луѓе излегле во Градски парк. Снимателот се измачил давајќи ги се истите пет-шест луѓе од жабја перспектива.
Битно е да се остварува дневната агенда на Мицковски.
Најнапред една вест ПРОТИВ некој политички непријател на шефот на ВМРО ДПМНЕ, потоа една дооолга вест во корист на самиот Мицковски, (без сериозен кадар за неговите контакти со присутните на Саемот, без содржина ама со многу издвоено време) и конечно веста за Шекеринска завиткана така да не му наштети на рејтингот на Мизковски: даден е приемот, но на начин на кој ќе се одбегне смислата, а ќе се задоволат личните потреби на двајца функционери од првата вмровска линија.
Жално, за што служи националниот радио-дифузер…
Текстот е личен став на Авторот.
