Во наредниот период може да се очекува придвижување на процесот во однос на прашањето за името, преку засилен контакт меѓу Македонија и Грција, но не и драматичен напредок… Ова е заклучокот на посредникот на ОН во спорот за името, амбасадорот Метју Нимиц, непосредно по средбата со министерот за надворешни работи Никола Димитров.
„За да се реши прашањето за името, потребен е генерален прогрес на двете страни, односно, тие да се ислушаат меѓу себе и да покажат отвореност“, истакна Нимиц, додавајќи дека во Македонија не дошол со нов конкретен предлог, туку целта била да се разговара концептите на новата Влада за градење политика на добрососедство.
Утрово, амбасадорот Нимиц се сретна и со премиерот Зоран Заев. На средбата се разговарало за можностите за придвижување на разговорите меѓу Македонија и Грција во врска со спорот што ги блокира евро-атлантските интеграции на Република Македонија.
„Јас и Владата на Македонија сме определени кон чекори што ги решаваат проблемите на граѓаните на Република Македонија. За тоа водиме инклузивни политики и така ќе биде и со решавањето на ова прашање, што ќе го водиме исклучително транспарентно, а не затворено како досега, само преку државен консензус, со опозицијата, со парламентот, со претседателот на државата и со граѓаните на Република Македонија“, рече премиерот Заев по средбата.
Амбасадорот Нимиц денеска треба да разговара и со лидерот на ДУИ Али Ахмети. Засега, нема најава за други средби. Во рамките на тридневната посета на Нимиц, медијаторот вчера имаше средба и со претседателот на Македонија, Ѓорге Иванов, на која била разгледана актуелната состојба во разговорите за надминување на спорот за името.
Посетата на Атина која требаше да се случи по посетата на Македонија, е презакажана заради активното учество на шефот на грчката дипломатија Никос Коѕијас во решавањето на кипарското прашање.
