ДРАГАН МИШЕВ
Откако на крајот на последниот ден од октомври пишувавме дека во основните училишта во скопските општини Аеродром и Гази Баба основците, построени во училишниот двор (или спортската сала) ја пејат државната химна, додека градоначалниците, од вмровска провиниенција, задоволно го „сукаат патриотскиот мустаќ“, не беше тешко да се предвиди дека ваквата тенденција ќе се прошири и на други „вмровски“ општини, (по „диктат“ на “шпицниот градоначалник“).
За жал, веќе на првиот ден од вториот месец од годинава, предвидувањето се оствари.
Од сега, секој понеделник учениците од штипските училишта ќе интонираат државната хима, а училиштата на видно место ќе го истакнуваат државното знаме, објави секретарката на Општината, Вишна Шорова Ангелова, која, како вистинска вмровка, долгогодишна функционерка во неколку државни институции, не заборави да нагласи „ знамето на Република Македонија“, иако зема плата од институција во држава чие уставно име е Република Северна Македонија.
Дали ја променила патната исправа со нова на која пишува „Република Северна Македонија, не дознавме, но тоа секако ќе се открие наскоро, доколку Вишна реши да отпатува (службено или приватно) надвор од земјата.
Епа, нека пеат децата, нека се „билда“ патриотизмот…
Но, гладен химна не се пее. Како не се сетивте, онака, веома врло патриотски, на децата во основните училишта да им обезбедите бесплатен топол оброк. Да им ги отворите кујните, мензите (кои претпоставувам постојат во училиштата, барем така беше „на времето“), па по отпеаната химна, така сите заедно, другарски, да појдат да каснат топол оброк, и да се напијат топло чајче, а може и топло млекце, па да им бидат стоплени и грлата и срценцата.
Или нивната исхраната не ви е доволно патриотска категорија за да брцнете во општинските каси? Детските грла ви се сепак бесплатни.
Сепак, на објавата на одлуката на општина Штип, на социјалните мрежи се појави и интересно прашање, кое истовремено претставува и логичен предлог до раководителите и вработените во општината:
А зошто и вие у општината да не ја пеете химната и онака ништо не работите?
А дека може поинаку, и патриотизмот, оној вистинскиот кој води грижа за напредокот на општината и државата, да се изрази и преку позитивни примери кои ќе придонесат за подобрување на социјалната состојба на граѓаните и ќе создаде подобри услови во образованието, докажува одлуката на општина Пробиштип, учениците од прво до петто одделение во училиштата во Пробиштип да добиваат бесплатен топол оброк.
