Началникот на либиската армија загина во авионска несреќа во Турција, изјави либискиот премиер, пренесува Би-би-си.
Генералот Мохамед Али Ахмед ал-Хадад и уште четворица други биле во авионот „Фалкон 50“ што летал од турската престолнина Анкара во вторник вечерта.
Во објава на X, турскиот министер за внатрешни работи Али Јерликаја изјави дека сигналот со деловниот авион бил изгубен во 20:52 часот по локално време – околу 42 минути откако полетал од аеродромот во Анкара.
Авионот што летал кон Триполи побарал итно слетување пред да се изгуби контактот. Остатоците од авионот подоцна биле пронајдени југозападно од Анкара, а сега се води истрага за тоа што ја предизвикало несреќата.
Во подоцнежна објава на X, Јерликаја напиша дека полицијата ги забележала остатоците во близина на селото Кешикавак, во округот Хајмана.
Тој рече дека „јавноста ќе биде информирана за понатамошниот развој на настаните“.
Турски функционер изјави за Ал Џезира дека првичните извештаи од истрагата укажуваат дека несреќата се должи на технички дефект.
Во Либија, Абдул Хамид Дбеибех, премиерот на меѓународно признатата Влада на национално единство (ГНУ) на земјата, изјави дека ја примил веста за смртта на генералот Хадад и други високи либиски воени функционери во авионот.
Премиерот го нарече ова „голема загуба“ за нацијата, велејќи дека Либија „изгуби луѓе кои ѝ служеа на својата земја со искреност и посветеност“.
Генералот Хадад и неговиот тим беа во Турција на разговори насочени кон понатамошно зајакнување на воената и безбедносната соработка меѓу двете земји.
М. Д.
