коментира: МАЈА ИВАНОВСКА
Постои еден комуниколошки феномен кој навистина не знам како соодветно би се превел на македонски јазик, а на англиски се нарекува whataboutism (whataboutery). Истиот е поврзан со идејата да се дискредитира соговорникот со тоа што на поставено прашање, наместо одговор, ќе понудите обвинувања за лицемерие, кукавичлук…, или реторичко пренасочување на темата, или наједноставно, наместо да одговорите на одредено прашање вие поставувате прашање „а што со…“, со што се обидувате да го одбегнете одговорот.
Или уште поедноставно, преку секојдневен пример.
Стигнува вест од словенечки портал дека унгарската влада на Орбан преку Љубљана испраќала пари до медиуми во Македонија блиски до ВМРО-ДПМНЕ, пари кои всушност биле наменети за финансирање на политичка активност во земјата и тоа во време кога се случувале преговорите за Преспанскиот договор.
Ја читаш веста и како што е редот во новинарството, почнуваш да вртиш телефони по споменатите медиуми за да ја добиеш и другата страна на приказната. Арно ама, од другата страна, наместо коментар и одговор на поставените прашања, на висок тон добиваш прашање „А зошто твојот шеф не сака да гостува на Алфа ТВ?“. Прашуваш каква врска има тоа со твоето прашање и со темата на разговор. Повторно не добиваш одговор. На крајот одговорот се сведува на „Не можам да коментирам нешто за што појма немам што се случува, ама да му пренесеш на шефот да собере храброст и да гостува во Алфа ТВ“. Прашуваш дали тоа е конечниот одговор на твоето прашање и соговорникот ти вели да.
Седнуваш да пишуваш, ги пренесуваш наводите на словенечкиот портал и конечниот одговор на соговорникот. Објавуваш. Добиваш реакција од истиот соговорник, која повторно не се однесува на темата, туку на неговата болка, за шефот де! А да, и фотографијата. Таа не му се допаднала. О.К. Му ја пренесуваш реакцијата без одговор и менуваш фотографија. Молк. Појасно здравје!
Патем, не очекувам дека лик како Момироски којшто не е навикнат да функционира поинаку освен по директива да го разбере тоа што го прави. Како ни тоа дека моето прашање ама нема баш никаква врска со гостувањето на Дерала во Алфа ТВ. Его трип кој себе си се доживува како материјал на кој некој би можел да изгради кариера нема капацитет за такво нешто.
БЛИЦ е рубрика на ЦИВИЛ МЕДИА во која објавуваме кратки, најчесто редакциски, коментари поврзани со веста на денот во рубриките ДНЕВНИК и ПОЛИТИЧКИ ОКЕЈ КОРАЛ, но и за други актуелни настани во земјата и во светот.
Сите права се задржани. Услови за користење, авторски права и заштита на приватноста.