ВЕСТ НА ДЕНОТ: Спасовски: Нема потреба од преодна или техничка влада, институциите имаат доволен капацитет
Нема потреба од никаква преодна или техничка влада, затоа што сметам дека овие институции имаат доволен капацитет да одговорат на потребите на граѓаните, а тоа е да им овозможат да донесат слободна одлука, изјави на денешната прес-конференција техничкиот премиер, Оливер Спасовски.
Прашан за тоа дека веројатно е последен технички премиер, Спасовски потсети дека моделот на формирање влада по Пржинскиот модел е договорен во услови на режим.
ЦИВИЛНИ АКТИВНОСТИ
Активистката Ирина Банишка во рамки на проектот „Зелените доаѓаат“ што ЦИВИЛ го спроведува во соработка со Фондацијата Хајнрих Бел, зборува за социјалната правда, урбанизмот, зелени вредности, еколошка правда и образованието.
„Иако последните години се направени позитивни промени на оваа тема, сметам дека едноставно не смееме да замолчиме мораме да останеме гласни. Но, за проблемите обично зборуваат луѓето што директно се соочиле со неправда. Луѓето што не се соочуваат со социјални проблеми се тие што молчат, независно што мислат и сакаат работите да се сменат на подобро. Тоа е себично. Не мора проблемот да е личен за да се реагира, ако денеска не е твој, утре тоа може да се смени, а како општествен проблем нема да исчезне. Потребен е голем исчекор напред, и многу гласни граѓани за да се влијае врз политичките агенди, за да се случат значителни промени“.
ФЛЕШ ВЕСТИ
Во предлог-програмата на новата Влада, чиј избор Парламентот го закажа во сабота на 29 август, предвидено е намалување на привилегиите на јавните функционери со цел да се спречи злоупотреба на функцијата за лични цели, намалување на буџетските трошоци и зголемување на ефикасноста во вршењето на функцијата.
Четвртиот сет на мерки, кој ќе биде донесен веднаш по формирањето на новата влада, ќе биде за пензионерите кои имаат пензии до 15 илјади денари, за невработените, односно неактивни баратели на работа и за самохраните родители да добијат домашни платежни картички, изјави техничкиот премиер во заминување Оливер Спасовски.
Претседателот Стево Пендаровски денеска учествуваше и се обрати на Вебинар на тема „Геополитичките проблеми на Западен Балкан среде Корона криза, Евроатлантска перспектива“ организиран од Алумни асоцијацијата Маршал Центар на Република Северна Македонија, во партнерство со Маршал Центарот од Гармиш и Секторот за јавна дипломатија на НАТО.
Владата и родителите разговараат за начинот на одвивање на наставата. Средношколскиот сојуз не отстапува од закажаниот протест в понеделник (31 август) и покрај тоа што со вчерашната одлука на Владата почетокот на учебната година е одложен за еден месец односно за 1 октомври.
СЛОБОДНА ЗОНА
Дехран Муратов во колумната „Големи и мали националисти“! пишува: „Додека големите „патриоти“ се препукуваат преку медиумите или социјалните мрежи, за тоа кој е поголем патриот, и додека разни политичари, аналитичари, па дури и глумци шират параноја и омраза, тврдејќи дека Македонија и Македонците ќе ги снема поради „преспанскиот договор“, „тиранската платформа“…, и се колнат дека државата и нацијата ќе ги бранат по цена на (туѓиот) живот, не гледаат во што ги претвараат младите (средношколците) од различни етнички заедници, кои секојдневно користат говор на омраза и пцовки на социјалните мрежи, а неретко „правдата“ ја решаваат и на улица со тупаници, клоци, ножеви“…
Д. Муратов
