Жителите на скопската општина Шуто Оризари ќе почекаат на предизборното ветување дека ќе се гради отворен пливачки базен, откако во дел од медиумите беше објавено дека Агенцијата за млади и спорт (АМС) го поништила тендерот за изведувач на градежните работи.
Наташа Смилевска од Агенцијата за млади и спорт, во телефонскиот разговор, за ЦИВИЛ Медиа, кратко одговори: „Не е баш така, дека нема да се гради базен во Шуто Оризари. Испратете ни и-мејл и ќе ви одговориме на прашањата“. Но, од петокот до денеска, нема никаков одговор на прашањето дали е навистина поништен тендерот за изградба на базен во Шуто Оризари?
Тендерот беше објавен десет дена пред предвремените парламентарни избори што се одржаа на 11-ти декември 2016 година. Проценетата вредност на проектот изнесуваше околу 730.000 илјади евра, додека рокот за реализација требаше да биде шест месеци од изборот на изведувач. Тендерската постапка беше отворена за сите компании од градежниот сектор до 23-ти декември 2016 година.
На 2-ри декември 2016 година, ЦИВИЛ Медиа објави текст за распишаниот тендер на АМС за изградба на базен во Шуто Оризари, во кој се потенцираше дека: „’Градителите’ 24/7, не се предаваат. Ја засипуваат јавноста со нереални ветувања – 24/7. Особено, ранливите и маргинализираните категории, социјално загрозените групи граѓани, како најголемиот дел од Ромите. Немаат исаф ‘преродбениците’, дури и кога ветувањата, како во случајот со ‘комбинираниот’ базен во Шуто Оризари се, најблаго речено, навредливи за жителите на оваа Општина, кои мака мачат како да скрпат крај со крај, како да преживеат…“
Пред речиси една година, на 15-ти февруари 2016-та, ЦИВИЛ Медиа ја објави колумната на Дехран Муратов, по тогашната најава за изградба на базен во Шуто Оризари.
„Оваа идеја би била добра, ако во Шутка нема хроничен недостаток на вода. Во летниот период, жителите на оваа Општина немаат вода ниту за пиење! Затоа, стои прашањето: Како ќе се наполнат базените што ги најави Груевски? Ќе се донесе вода со цистерни? Во перманетната предизборна кампања, редовно се ветува дури и невозможното. Па, така, и ветувањето за базените, може да држи вода. Но, на жителите во Шутка далеку побитна и попотребна им е водата. Онаа, за пиење, за туширање, за перење алишта и садови, вода за подготвување на ручек…“
Изборите завршија, и тендерот се поништи. Најверојатно повторно ќе се активира за време на изборната кампања за локалните избори…
