„Ние подолг период немаме Државна изборна комисија… Но, нема лидер на партија кој победил на избори, а првата изјава да не му е – дека биле фер и демократски… А ние сме далеку од добри избори…“, изјави Новакоски надоврзувајќи се на претходните соговорници, на јавниот настан „Аларм: Слободни избори, услов за кој (не) се преговара“ во организација на ЦИВИЛ – Центар за слобода.
Новакоски истакна дека од 2009 година па наваму, нема извештај што ги оценува изборите како фер и демократски, а сериозните забелешки од тие извештаи, оној што ќе победи ги заборава или не ја гледа сериозноста во нив. Според него, ЦИВИЛ добро ги детектира сите пропусти во изборните циклуси.
„Првата забелешка е дека е повредено универзалното право на глас. Втората забелешка се однесува на експериментите со Избирачкиот список и тоа, нема да ги именувам, од некои невладини организации. Кога ДИК не работи подолг период, а имате околу 130 вработени, дали некој се прашува што тие луѓе таму работат во моментов. И дали досега не можеше Избирачкиот список да го направат еден од подобрите во Европа“, забележа Новакоски.
Иако според Новакоски никој не зборува за Избирачкиот список, тој ќе се појави како проблем доколку има референдум по решавање на спорот за името. Избирачкиот список, смета тој, ќе биде главната причина за оспорување на референдумот.
„Конечно, треба да се реши каква ДИК е потребна. Преодното решение е добар почеток, но сепак, доаѓаме до моментот – на опозицијата да и се даде местото претседател и да се работи во ДИК со контрола од некого. Но, во тој период претстојат многу предизвици. Треба ДИК да се професионализира“, смета Новакоски.
Меѓу другото, Новакоски истакна дека треба да се реши проблемот со гласањето на болни лица и да се прифати предлогот за една изборна единица.
Во изјавата за медиумите на почетокот на настанот, Новакоски истакна дека според најавите, ДИК повторно ќе биде формирана со партиски членови, што укажува дека никој нема намера да ја професионализира. Целта што треба да се постигне, изјави Новакоски за медиумите, е ДИК да биде институција што целосно ќе се одвои од политичките партии.
Биљана Јордановска
Камера: Атанас Петровски
