Претседателството на Српската напредна партија (СНС) по денешната седница соопшти дека е донесена одлука да се оди на нови избори во Белград, објави N1.
Втората одлука е на овие избори да се оди со „што е можно поширок фронт“.
Утре СНС ќе започне со кампања во Шумице, истакна досегашниот градоначалник на Белград, Александар Шапиќ, додавајќи дека датумот на изборите ќе биде одлучен подоцна.
„Белград стои веќе пет месеци и ние сме свесни за важноста на ЕКСПО, кој е моторот на придвижување на Србија, и затоа сметаме дека изборите треба да дојдат што е можно поскоро“, додаде Шапиќ.
Претходно денеска, српскиот претседател Александар Вучиќ истакна дека го советувал раководството на Српската напредна партија да оди на нови избори во Белград, за, како што рече, да не се повтори грабежот од 2008 година.
„Многу е важно да се оди на нови избори, затоа што е подобро да се изгуби власта отколку да се учествува во таков вид на кражба на изборите што Србија ја виде во 2008 година. Тоа е мојот совет и моето барање за вас“, рече Вучиќ, обраќајќи се на партиски колеги од СНС.
Вучиќ алудираше на постизборното коалициско формирање влада, на која во 2008 година и се приклучија сегашните партнери на СНС – социјалистите на Ивица Дачиќ, а за градоначалник беше избран еден од лидерите на денешната опозиција Драган Ѓилас.
Конститутивната седница на белградското Собрание беше одложена вчера, по втор пат за две недели, што го направи речиси извесно повторувањето на изборите во главниот град на Србија, бидејќи владејачката СНС не може да обезбеди легитимно мнозинство советници по изборите во декември 2023 година. за кои опозицијата тврди дека се украдени.
Г. Т.
