На електронските адреси на 15 училишта во Скопје (13 средни и две основни) попладнево е упатена закана за поставена експлозивна направа, во дел од објектите веќе се завршени проверките и е утврдено дека станува збор за лажни пријави, информираат од Министерството за внатрешни работи.
Веднаш по добиените пријави до СВР Скопје, од полициски службеници се преземени мерки за безбедно евакуирање на објектите и во тек се антитерористички проверки и се преземаат мерки за расчистување на случаите. Во дел од објектите се завршени проверките и утврдено дека станува збор за лажна пријава. Во останатите, проверките се во тек, наведуваат од МВР.
Како што најави претходно премиерот Димитар Ковачевски, денеска ќе се одржи координативен состанок на безбедносните служби, каде што ќе се разговара за состојбата со лажните дојави за бомби во изминатиот период.
Последната серија на закани за бомби беше регистрирана во петокот во 15 училишта, од кои десет во Скопје и пет во Битола.
Претходно денеска американската амбасада во Скопје издаде безбедносно предупредување до граѓаните на САД кои планираат да патуваат или престојуваат во земјава да внимаваат поради потенцијално зголемување на криминалот за време на празниците, но и во врска со дојавите за поставени бомби во училиштата и други објекти, како и на места каде што има голема фрекфенција на луѓе.
