Пред локалните избори во Северна Македонија се забележува зголемена активност на руската пропаганда преку пренесување на про-руски наративи во дел од македонските медиуми, кои имаат за цел, иако се работи за локални избори, да го зголемат анти – ЕУ и анти-западното расположението кај таргетираниот дел од гласачкото тело.
Така, повеќе македонски медиуми, познати од претходно по зачестеното некритичко пренесување на наративите на руските функционери и пропагандисти . Во последниот наплив на руски пропаганда во македонскиот информативен простор, овие медиуми, речиси оркестрирано ја пренесуваат изјавата на заменик-претседателот на рускиот Совет за национална безбедност, Дмитриј Медведев, познат по неколку свои несмасни коментари, која тој ја споделил на својот Телеграм канал, по повод најавата на Трамп дека размислува да ја снабди Украина со американски ракети Томахавк, како одговор на секојдневните руски ракетни напади врз цивилните цели и критичката инфраструктура низ Украина, во кои има голем број цивилни жртви.
Така, некои со апокалиптични наслови за заплашување на читателите, како „ТОМАХАВК ОД УКРАИНА БИ ПОВЛЕКОЛ НУКЛЕАРЕН ОДГОВОР ОД РУСИЈА Медведев вели дека тоа ќе биде лошо за сите, особено за Трамп“, други со малку поблага варијанта, како „Медведев предупредува: Испораката на Томахавк ракети може да има сериозни последици за САД и Трамп“ ја споделуват „острата“ критика на заменик-претседателот на рускиот Совет, дури и користејќи ги неговите погрдни квалификации „ѕвездено-пругастиот чичко“ за Трамп дека „испораката на тие ракети може да заврши лошо за сите, а пред сè за самиот Трамп“, истовремено, некои дури и го толкуваат и скриеното значење на неговите зборови, дека тој алудирал на можен нуклеарен одговор од Москва.
Истовремено, овие медиуми пренесуваат дека Медведев, во истиот пост истакнал „дека е невозможно да се направи разлика помеѓу нуклеарната и обичната верзија на Томахавк“, изјава дадена во време кога Москва ја напаѓа Украина со балистички суперсонични ракети „Кинжал“ и „Искандер“, способни да носат термонуклеарни/тактички нуклеарни боеви глави, и за кои исто така е невозможно да се направи разлика помеѓу нивната нуклеарна и обична верзија.
Написи со слични наслови и текстови се појавија и во медиумите во соседна Србија, од каде најчесто се преземаат текстови со содржини пласирани од руските пропагандисти.
Ова секако не е прв пат путиновите пропагандисти да се закануваат со нуклеарни напади, како што беше случајот кога презентерот на руска национална телевизија, Владимир Соловјов, се пофали дека руските хиперсонични ракети наречени „Кинжал“ се способни да го погодат Лондон за само девет минути по лансирањето. Исто така, и некои портали во земјава можат да се пофалат со претходно пренесувањето на соопштението на Министерство за одбрана на државата агресор, во кое се глорифицира големиот успех на руските вооружени сили кои успешно тестирале интерконтинентална балистичка ракета.
Зголемената руска пропаганда во дел од македонските медиуми во пресрет на локалните избори има повеќекратни цели, кои се во корелација во пошироката стратегија на Кремљ за влијание во Европа, на Балканот, вклучително и во Северна Македонија.
Руската пропагандата, преку погодни медиуми во Северна Македонија, која е членка на НАТО и претендент за влез во ЕУ, се стреми да ги прикаже Алијансата и ЕУ како лицемерни, корумпирани, непријателски настроени, со што треба да го ослаби кредибилитетот на овие институции кај граѓаните, што кореспондира со изјавите на партискиот врв кој, следејќи ги конфронтацијата со европските иституции на релацијата Белград-Будимпешта, ја обвинува ЕУ за наводен напад врз македонскиот идентитет, додека, од друга страна сака да се прикаже Русија и Путин како сојузници во борбата за одбраната на македонизмот, со што ќе се одвратат граѓаните да гласаат за проевропските опции.
Целта на зголеменото присуство на руските пропагандни наративи е создавање амбиент на недоверба, нестабилност, назадување на демократските процеси и забавување на евроатлантските интеграции, со што Северна Македонија на подолг рок би останала подложна на руско влијание и ранлива за идни геополитички игри.
Драган Мишев, во соработка со Тимот на ЦИВИЛ за мониторинг на хибридните закани (ЦХТМ)
Оваа статија е дел од проектот Демократски навигатор – стратешки одговор на дезинформациите и хибридните закани, градење демократска отпорност.
