Амбасадата на САД во земјава, преку својот Фејсбук профил издаде соопштение во врска со средбата на американскиот помошник државен секретар Џемјс Обрајен со лидерот на ВМРО-ДПМНЕ, Христијан Мицкоски во кое се нагласува дека на средбата се разговарало за односите и актуелните прашања помеѓу двете држави, и на која О’Брајан ја истакнал силната поддршка на Соединетите држави за патот на Северна Македонија кон членство во ЕУ и важната улога што треба да ја имаат сите политички партии во земјата во поддршка на овој процес.
Додека во соопштение за средбата кое го издаде ВМРО-ДПМНЕ се вели дека, меѓу другото“, Мицкоски истакнал дека освен членството во Европската Унија, стратешки интерес на државата е и заштита на идентитетот, помошник-државниот секретар на САД за Европа и Евроазија, Џејмс О’Брајан, од друга страна во интервју за „360 степени“ изјави дека е важно Северна Македонија да изнајде начини за да се движи напред и дека единственото решение е да се реши прашањето за уставните измени.
„Има понуда на маса. И ако сакате да знаете за некого кој е и како ќе постапува кога ќе биде на власт, видете како ќе реагира на таа понуда. Ако тие велат, на многу јасен начин, еве ја алтернативата и верувам дека таа е прифатлива за другите, тогаш можете да процените дали се во право или не. Ако велат – имам подобра понуда, но нема сега да ви кажам што е – тоа е личност од која не би купиле автомобил. Па, мислам и дека не би требало да гласате за нив, исто така“, изјави помошник-државниот секретар на САД за Европа и Евроазија, Џејмс О’Брајан за „360 степени“.
Тој додаде дека граѓаните кои гласаат го прават конечниот избор, но според него луѓето не би требало да гласаат за тие кои нудат алтернатива, без да кажат што е алтернативата.
Прашан за ставот на најголемата опозициска партија ВМРО-ДПМНЕ дека нема да поддржат уставни измени под бугарски диктат и дали има шанси за интервенции во Преговарачката рамка, О‘ Брајан истакна дека нема да има подобра понуда.
„Се движите кон изборен период. Знаеме дека се е тешко во таков период. Нема да коментирам дали работите ќе се случат сега или подоцна, но јасно е дека има понуда на маса. Некој може да каже дека ќе дојде со подобра понуда. Но, ако не ви каже за што точно станува збор и не ви каже зошто другите би ја прифатиле, само се обидува да ве измами. И се надевам дека гласачите се попаметни од тоа, посочи О’Брајан.
Помошникот-државник секретар на САД исто така порача дека ако не се прифати понудата која што е на маса, земјава ќе сврти грб на историјата, и иако изгледа задоволувачки во моментот таа одлука ќе биде на штета на економијата, повеќе граѓани ќе се иселуваат и ќе ја уназади земјата.
М. Д.
