Во контекст на пандемијата наспроти неизвесноста со изборите, а во таа смисла и широката палета од политички игри за власт, потсетување на колумната на Сашо Орданоски „Кога политиката ќе ја сретне короната“, објавена на 18 март.
„… Владата има право за носење одлуки со законска тежина, без да се консултира Собранието, кое и така е распуштено. Значи, се работи за најстарата игра од кога е измислен светот и политиката, околу тоа кој, колку и со кои ограничувања или без ограничувања ќе има МОЌ во владеењето“, потенцира Орданоски на почетокот од колумната.
И од тука почнува играта на ВМРО-ДПМНЕ и борбата на СДСМ со таа моќ што ја има, вели Орданоски, во вонредна ситуација, одложени избори и пандемија во глобални рамки, да носи одлуки со законска важност во справување со здравствената, но и економската криза.
„Затоа се трудат (ВМРО-ДПМНЕ) успехот да биде „ограничен“ во „здравствениот“ дел на кризата, паралелно со, барем релативен, неуспех во другите аспекти на делувањето на власта: економијата, социјалните мерки, па и психолошката состојба во општеството. За, кога конечно, ќе се презакаже датумот за вонредните избори, да имаат со што да ѝ парираат на сегашната власт, предводена од СДСМ. Инаку, го „обраа бостанот“ на изборите – за што и така шансите не им се најдобри“, констатира Орданоски.
