Турскиот министер за надворешни работи Хакан Фидан денеска престојува во официјална посета на Париз, каде што ќе разговара со својот француски колега Жан-Ноел Баро за билатералните односи, односите меѓу Турција и ЕУ, европската безбедност, војната во Украина и други актуелни прашања, јави Анадолија, пренесе МИА.
Според дипломатски извори на кои се повикува агенцијата, Фидан ќе ја нагласи важноста на блискиот дијалог со Франција и ќе изрази поддршка за зголемување на трговската размена и меѓусебните инвестиции.
Министерот ќе инсистира односите меѓу Турција и ЕУ да се гледаат низ стратешка перспектива, а не да се користат како инструмент за внатрешнополитички агенди на одредени земји-членки. Тој ќе побара од Франција поддршка за отстранување на „вештачките пречки“ во односите меѓу Анкара и Брисел, како и конкретни чекори од страна на ЕУ во оваа насока, наведува Анадолија.
Фидан ќе ја потенцира и клучната улога на Турција во европската безбедност и ќе се заложи за засилена координација при создавањето на новата европска архитектура за безбедност.
Очекувано, во фокусот на разговорите ќе бидат и напорите за воспоставување праведен и траен мир меѓу Русија и Украина, при што турскиот министер ќе ја потврди подготвеноста на Анкара да даде свој придонес во процесот.
Се очекува да се отвори и прашањето за Сирија, при што Турција ќе инсистира на повлекување на Курдската работничка партија (ПКК) и Силите за заштита на народот (СЗН) од северните делови на земјата. Анкара ги смета овие организации за терористички групи.
Дополнително, турската страна ќе го покрене и прашањето за израелските дејствија во Газа, истакнувајќи ја „неопходноста меѓународната заедница да преземе мерки за запирање на злосторствата против човештвото“.