Во весниците денеска е објавен оглас за нови членови на Државната изборна комисија (ДИК) за следните шест месеци. Ова ќе биде привремен состав на Комисијата, бидејќи до есен се очекува да биде изготвено новото изборно законодавство, со кое ќе биде опфатен и составот на ДИК.
Собранието вчера ја достави одлуката за распишување на огласот до Службен весник, а се однесува на избор на претседател, заменик-претседател и петмина членови на Комисијата. Огласот ќе трае осум дена од денот на објавување во Службен весник.
Собраниската Комисија за прашања на изборите и именувањата треба да подготви предлог листа по завршувањето на огласот.
Претседателот на Собранието ги известува партиите што освоиле најмногу гласови на последните избори во рок од три дена од денот на приемот на известувањето да му достават предлог за членови на ДИК.
Претседателот на привремениот состав и двајца членови на ДИК ќе треба да го делегира опозицијата, а партиите на власт да предложат потпретседател и тројца членови.
Членовите на ДИК ќе ги избира Собранието со двотретинско мнозинство гласови од вкупниот број пратеници.
Лицето кое ќе биде избрано за член на ДИК треба да е државјанин на Република Македонија со постојано место на живеење во земјата, да има завршено високо образование со најмалку осум години работно искуство и да не е член на орган на политичка партија.
На избраните претседател, потпретседател и членови на Комисијата од денот на изборот работниот однос ќе им мирува.
Засега нема информации кој ќе биде во составот на ова привремено изборно тело. Партиите се уште не ги соопштуваат можните кандидати кои би ги поддржале, ниту, пак, има информација, каква ќе биде поделбата на местата кај владејачките партии на Албанците ДУИ, Беса и ДПА. Но, реално е дека до крајот на јуни Македонија ќе има нов состав на ДИК.
Освен за избори Државната изборна комисија е надлежна и за организирање референдуми и јавни изјаснувања, а клучна е исто така за мандатите на пратениците, градоначалниците и советниците во локалните самоуправи.
За ваквото решение за шестмесечен привремен состав на ДИК беа согласни сите парламентарни партии и измените на Изборниот законик, во делот на ДИК беа донесени едногласно.
Откеко во јавноста беше обелоденето дека земале големи надоместоци, членовите на последниот состав на ДИК си поднесоа оставки, со исклучок на претставничката на Беса.
Во овој контекст, ЦИВИЛ -Центар за слобода денес во 13 часот во хотел Континентал организира 120-минутен јавен настан „АЛАРМ: Слободни избори, услов за кои (не)се преговара“, на кој, уште еднаш, во проширена и детализирана форма, ќе ги презентира препораките за реформи во изборниот систем. Настанот ќе биде поделен во два дела: воведни излагања на експертскиот борд на ЦИВИЛ и дискусија од пријавените говорнички и говорници на самиот настан.
Воведни излагања ќе имаат Хедер Роберсон Гастон (САД), Сашо Орданоски, Александар Новакоски, Сандра Гавриловска и Џабир Дерала.
Д. Т.