Операторите кои вршат реемитување преку различни платформи (ИПТВ, кабелски, ДВБТ и сателитски), членки на Здружението на информатичко-комуникациските технологии при Стопанската комора на Македонија, денеска по дискусија за предложените измени на Законот за аудио и аудиовизуелни медиумски услуги најавија дека ќе настапуваат аргументирано и ќе бараат да се најдат реални законски решенија.
За таа цел, како што соопштуваат, ќе бараaт интензивни контакти во текот на идната недела со Министерството за информатичко општество и администрација и Агенцијата за аудио и аудиовизуелни медиумски услуги.
На дискусијата заклучиле дека операторите кои вршат реемитување работат исклучиво според постојните законски решенија во Македонија. – За тоа сведочи фактот дека ниту еден оператор нема никаква пријава за неправилности во работењето од страна на државните органи, задолжени за мониторинг на работењето на операторите. За истото сведочи и постојаниот 24-часовен мониторинг што го врши Агенцијата за аудио и аудиовизуелни медиумски услуги каде не се констатирани прекршувања, се вели во соопштението од Здружението.
Дефинитивните ставови за предложените измени на Законот операторите ќе ги објават по одржувањето на планираните состаноци.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.