Тоа е една поинаква организација, бескомпромисна и упорна, секогаш заедно со граѓанките и граѓаните на Република Македонија. Гласна организација која никогаш не се повлекува пред притисоците и заканите. И додека многумина заглавија во бирократија и се фолираат со години, заглавија во партиските мрежи и лавиринти, оваа организација докажа дека слободата и демократијата се освојуваат секој ден и самостојно, со посветена, искрена и неуморна работа.
Заложбите за демократија, правда, слобода и еднаквост, за човекови права и слободи – не се празни пароли и клучни зборови во проекти кои носат пари. Човековите права и слободи се вистинска животна и морална определба и стремеж за луѓето кои работат во оваа организација.
Без потрага по награди, медали и признанија – луѓето на оваа организација секој ден се на улиците на македонските градови и села, секој ден се присутни во јавноста преку своите извештаи за состојбата на човековите права, за вистинскиот живот, за судбините на илјадници луѓе.
Нема мнозинства и нема вештачки конструкции во оваа организација. Силни и независни индивидуи кои заедно прават виножито од различности, етнички, верски, родови, социјални… Каква што е Македонија. На едно место собрани сите што сакаат нешто да направат за општеството попрво отколку за себе. Луѓе кои често мора да бидат опоменати дека е доста со работа, дека не смеат да се преморуваат толку многу, секој ден, па и за време на празници и викенди.
Да, тоа е ЦИВИЛ – Центар за слобода. Тоа не е структура, тоа се луѓе со големо срце и вредни раце. ЦИВИЛ не е работно место, туку труд и заложба, определба, начин на мислење, начин на живот, жртвување на комодитетот и личниот интерес за да се постигне повисоката цел. При сето тоа, ЦИВИЛ е место за учење, креативност, споделување и дебата.
ЦИВИЛ – Центар за слобода полни 18 години денеска. На денешен ден, 25 ноември 1999 година, се одржа Основачкото собрание на ЦИВИЛ во Скопје. Организацијата ја основаа неколку независни интелектуалци, уметници и новинари со цел да ги застапуваат и бранат човековите права и слободи. Активни уште од 2005 година, веќе со неколку успешни заеднички проекти до тогаш, тие решија да создадат една поинаква организација, блиска до граѓанките и граѓаните. Им успеа, благодарение на довербата и поддршката од илјадници граѓанки и граѓани низ целата земја и надвор од неа.
Преку сто проекти и уште повеќе акции, анализи и извештаи, соопштенија и апели, национални и интернационални кампањи, илјадници јавни настани и презентации, креативни работилници, школи, семинари… Медиумски и граѓански ресурс за општеството.
Сето време – гласни и горди. ЦИВИЛ!
