Претседателот Пендаровски во изјава по седницата на Советот за безбедност која се одржа вчера, ја оцени како „грозна“ изјавата на бугарскиот министер за надворешни работи Николај Милков, кој рече дека во Македонија „се враќа традицијата на палење, стрелање и насилство врз луѓе“.
Пендаровски го упати бугарскиот министер „да прошета до Ваташа и да види дел од традицијата на колежи, стрелање и насилство“, алудирајќи на злогласниот масакр во кавадаречкото село, извршен во Втората светска војна од страна на бугарскиот окупатор, кога биле стрелани дванаесетмина младинци од селото.
„Во однос на изјавата на господинот технички министер за надворешни работи… Тоа е прилично грозна изјава… вели: „Во Македонија се враќа традицијата на колежи, стрелање и насилство’. Единствено таа изјава може да биде точна ако мисли на периодот ‘41-’44 (окупацијата на Бугарија врз Македонија*).
-Кога техничкиот министер за надворешни работи ќе има време може да прошета до Ваташа, да види дел од таа традиција“, изјави Пендаровски.
Претходно, Претседателот Пендаровски изјави и дека предложил да им се забрани влезот во земјава на повеќе лица од Бугарија, меѓу кои и на европратеникот Ангел Џамбаски.
Пендаровски со порака до бугарските власти.
„Изолирајте ги политички луѓето кои не сакаат добрососедски односи, ние тоа го правиме и ќе го правиме кај нас. Македонија не ви е непријател, меѓутоа, оваа држава има закони, има достоинство и кога тие граници ќе бидат преминати, ние секогаш ќе реагираме за да се заштитиме“, рече претседателот, додавајќи дека ова го прави секоја сериозна држава во светот, вклучително и Бугарија.
„Предлагам во наредниот период далеку подобра координација меѓу надлежните институции од двете земји, со цел да не дозволиме европската агенда и билатералните односи да станат жртва на анахрони националистички и популистички политики од двете страни“, рече Пендаровски.
