Советот за безбедност на Република Северна Македонија денеска во претседателската „Вила Водно“ ја одржа деветата седница за актуелната состојба со пандемијата на Ковид-19, на која присуствуваа сите постојани членови на Советот, освен професорот Марковиќ, кој е отсутен поради професионални обврски и министерот за внатрешни работи Оливер Спасовски, а надвор од постојаниот состав, присуствуваше и министерот за здравство, на покана на претседателот Пендаровски.
По завршувањето на седницата, Пендаровски истакна дека на дневен ред имале само една точка, односно актуелната ситуација со КОВИД-19 и мерките и активностите на надлежните органи за сузбивање на пандемијата.
„Министерот Филипче нè информираше за најновата состојба, за ангажираните капацитети, човечките и материјалните ресурси, за работата на Комисијата за заразни болести и за плановите за работа на болниците низ земјата, поради прифаќање на напливот на нови пациенти. Премиерот информираше детално за мерките на Владата за поддршката економија и на сите категории на граѓани кои се најмногу погодени од пандемијата. Бевме информирани и за функционирањето на Централниот кризен штаб, луѓето во Кризниот штаб на дневно ниво следат што се случува во регионот и во Европа и се подготвени о најкус можен рок практично да ги применат најдобрите модели и кај нас“, истакна Пендаровски.
Претседателот додаде дека поради есенскиот бран на пандемијата здравствениот систем се реорганизира, се ангажираат дополнителни капацитети, се прават максимални напори да се тестираат што е можно повеќе лица и да се згрижат и третираат што е можно повеќе пациенти.
„За жал, сведоци сме дека ситуацијата не се подобрува, секојдневно имаме значителен број на заболени, а бројот на оние чии животи згасна поради КОВИД-19 исто така е во пораст““, додаде Пендаровски.
Во однос на сетот на мерки кои се применуваат, Пендаровски истакна дека јасно е дека не постојат мерки кои се препорачани од СЗО или се применуваат во некои други држави и даваат позитивни ефекти, а не се применуваат кај нас.
„Не очекувам и мислам дека никој не очекува оваа ситуација да се користи за добивање на политички поени, затоа што не знам како некој воопшто мисли да добива политички поени кога реално сите сме губитници со високите бројки на заразени и починати на наши сограѓани кои ги бележиме секој ден“, истакна Пендаровски.
Пендаровски додаде дека ситуацијата е исклучително сериозна, човечките и материјалните ресурси се ангажирани практично до својот максимум,и дека со оглед на тоа што доаѓа сезоната на сезонски грипови, следните недели сигурно нема да биде полесно.
„Со цел да истраеме, како никогаш досега потребни ни се одговорност, меѓусебна солидарност и претпазливост. Уште еден апел до граѓаните, во отсуство на вакцина или лек за оваа болест, нема друга алтернатива освен доследно почитување на заштитните протоколи, физичка дистанца, носење маска, и драстично намален број на дружби и семејни собири. Направете го тоа за себе и своите најблиски“, додаде Пендаровски.
А. П.