Активисти од повеќе граѓански здруженија до Министерството за внатрешни работи поднесоа пријава за говор на омраза и закани до Петар Богојески, државен советник во Министерството за одбрана.
„На фејсбук страната на политичкиот лидер на партијата Македонски концепт и вработен во Министерството за одбрана на Република Северна Македонија, Петар Богојески, во последните неколку денови континуирано се шири говор на омраза.
Со своите објави на фејсбук страната и на приватниот профил, истиот предизвикува национална, расна и верска омраза, раздор и нетрпеливост.
Тој, исто така, јавно шири говор на омраза против ромската заедница и припадниците на исламската заедница, кој е во спротивност на темелните вредности на нашата држава.
На 24 мај, објави пост во кој вели: „Глумицо една, јас не сум ти крив што се мразиш себе си и кожата ти српска во која си се родила! Не сум јас крив што си го мразиш племето свое од каде потекнуваш!“
Овој пост е наменет на припадничката на бошњачката заедница Мерсиха Смаиловиќ која десет дена е мета на контиуниран напад и говор на омраза на Фејсбук страницата и профилот на лицето Петар Богојески.
Преку овој пост се шири расистички и ксенофобичен материјал по пат на компјутерски систем, посебно поради бројните коментари и споделувања овој пост стигнува до голем број корисници на Фејсбук. Се негира и понижува идентитетот на нашата заедница поттикнувајќи расна, етничка и друга дискриминација, омраза и нетрпеливост.
Во бројните коментари на кои му реплицираат сограѓаните, покажува висок степен на нетолеранција и говор на омраза. На лице кое е припадник на бошњачката заедница, му реплицира: „Ризвановиќ Едо, не ви дојде памет уште? Во деведесетите?!? Уште сакате?““, се вели во заедничкото соопштение на подносителите на пријавата, Селма Ризвановиќ Мандал – Здружение на жени ЕДУ НИСА Скопје, Аделаид Каришиќ – Бошњачки Истражувачки Центар Скопје, Изета Бабачиќ – Здружение на бошњачката жена Диванхана Скопје, Мерсиха Смаиловиќ – Здружение на граѓани ЛЕГИС Скопје, Мухамед Шукурица – Форум на Бошњаците во Македонија и Јусуф Чоловиќ – Здружение на граѓани НАФАКА.
Во пријавата се бара кон Петар Богојески да се преземат соодвени мерки согласно Казнениот законик на Репубика Северна Македонија.
