„Немојте да шпекулирате дека некој нешто прави во четири очи. Зоран Заев секогаш кога разговарал соопштувал во јавноста. Никола Димитров секогаш кога разговарал соопштувал во јавноста. Секој документ што е создаден на формален состанок стои во архивите, на МНР, во Влада, кај претседателот на државата“ – рече премиерот Зоран Заев од парламентарната говорница предупредувајќи ги пратениците од опозицијата дека со своите дискусии можат да направат непоправлива штета во процесот за решавање на спорот за името, како што известува државната информативна агенција МИА.
„Сѐ што досега е преговарано директно на лидерска средба, директно на состанок сум го споделувал со опозицијата и со другите лидери во Македонија. Се преговара, но на крајот институциите во Македонија се тие што носат одлука. Во овој случај, заради тоа што е специфична работа, многу важна, граѓаните одлучуваат на референдум. Затоа, ве молам да бидеме внимателни посебно по овие прашања… Прашањето е тешко, но треба да се реши и заради неговата чувствителност треба да се внимава…“ – рече премиерот по дискусиите на Димитар Стевананџија и Крсто Јовановски од ВМРО-ДПМНЕ.
Стевананџија побара од Заев доколку се дојде до предлог за решение за името, тоа да оди најпрво на референдум и побара за договорот да не се гласа во Парламентот и да не ги изложува пратениците од власта на, како што кажа, „трет шок после гласањето на двојазичноста и на договорот со Бугарија“.
„Да ги прашаме најпрво граѓаните, а не прво пратениците затоа што ние сме минливи и менливи, нашиот мандат трае две, три, четири години, некогаш и помалку и немаме мандат за нешто кое што постои две илјади години да го решаваме овде“ рече Стевананџија.
Јовановски, зборувајќи за работата на Владата во изминатата година, го обвини премиерот за распродажба на името, јазикот, идентитетот на земјата…
„Нанесувате непоправливи штети со вакви драматургии“ – му реплицираше Заев потенцирајќи дека Република Македонија е пред пресериозни одлуки.
Премиерот потсети дека 25 години сме ФИРОМ, дека треба да се направи иднина за сите деца во земјата.
„Вие сте добар глумец, но овде сте пратеник и треба да се однесувате чесно кон граѓаните коишто ве избрале. Плукате со невидени зборови, нанесувате непоправливи штети“ – рече премиерот Заев во својата реплика, додавајќи дека решението го јакне идентитетот и побара од пратениците да бидат трпеливи.
„Немојте, барем заради и тие гаранции што ги имаме, Парламентот одлучува, институциите одлучуваат, граѓаните кај нас на референдум одлучуваат. Не правете штети заради тоа што и вие сте за НАТО и за ЕУ интеграција. И немојте да шпекулирате и за јазикот, и за идентитетот. Тие шпекулации прават проблеми“ – рече премиерот.
За договорот со Бугарија, Заев рече дека во него стои „двата народи“ и оти е потпишан на македонски јазик, согласно Уставот.
Од споменикот во Струмица кажа дека е избришан зборот „бугарски“ пред „фашистички куршум“.
„Остана фашистички куршум оти треба да градиме пријателство, заради тоа сум го направил тоа како градоначалник. Внимавајте како зборувате, заради тоа што национализмите, популизмите го избркаа нашиот народ од државата“ – рече премиерот.
Претходно, во попладневниот дел од расправата пратениците од редовите на опозицијата во своите дискусии ја обвинија Владата дека не сработила ништо во изминатата една година, туку само направила штети за државата и презела мерки што го намалиле стандардот на граѓаните. Реконструкцијата на Владата, рекоа, е политички пазар заради потреба од зголемување на мнозинството.
Павлинче Честојнова од ВМРО-ДПМНЕ смета дека реконструкцијата нема политичка содржина и оти целта не е подобро спроведување на реформите, туку само желба на премиерот да им најде место на новите и помали партнери.
За разлика од нив, пратениците од партиите на власт застанаа во одбрана на политиките на Владата.
„Сегашната Влада презеде многу исправни чекори, а дека таа е на прав пат покажува и безусловната препорака од Европската комисија“ – рече Мирсада Емини – Асани. Горан Милевски од СДСМ, рече дека сака да ги потсети пратениците од опозицијата дека не се работи за интерпелација на работата на Владата туку за избор на нови министри за образование, правда, култура и министер без ресор.
По паузата за Ифтар, парламентот гласаше за реконструкцијата на Владата. Остана ехото од тешките зборови изречени во парламентот оваа петочна вечер, во пресрет на протестот на ВМРО-ДПМНЕ.
М.Л.