„Иако имам валиден договор за работа, денеска откако се вратив од одмор и боледување ми беше забрането да влезам во конфекциската фирма ‘Даматекс’ од Пробиштип, бидејќи добив усмен отказ“, изјави за ЦИВИЛ Медиа, текстилната работничка, Силвана Пеншова. Таа истакна дека пред извесен период паднала на работно место и се здобила со повреди, а не добила ниту лекарска помош.
„Кога паднав на работа, не ми викнаа ниту лекар, морав да го повикам мојот сопруг и да одам на лекарски преглед. Потоа, побарав да ми биде платено, бидејќи се повредив на работно место. Но, не добив ништо“, истакна Пеншова.
Таа потенцира дека „трн во око“ на сопствениците и на менаџментот на фирмата е откако пред извесен период, имало неколку пријави од незадоволни работнички и а тие мислат дека токму таа ги пријавува.
„Ниту знам кој ги испраќа пријавите, ниту каде пријавуваат работничките. Проблемите настанаа по објавен текс во порталот ‘Гласно’, дека во фирмата во која што работам, условите се одлични и дека само една работничка пријавува за кршење на работничките права. Веднаш по објавениот текст, бев повикана и предупредена да се поправам во наредните 15 дена, или ќе добијам отказ. Јас побарав писмено да ми кажат како да се поправам, но до денес, не добив ништо писмено“, додава Пеншова.
Претседателот на невладината организација „Гласно“, Горан Трајков за ЦИВИЛ Медиа, вели дека пред извесен период, сопствениците на фирмата го побарале да направи обиколка на текстилната фабрика и да види во какви услови работат.
„Сопствениците мислеле дека јас ги праќам пријавите и откако им објаснив дека немам никаква врска со тие пријави, побараа од мене да дојдам во фабриката, да видам во какви услови работат. Јас ја посетив фабриката и разговарав со вработените, и потоа констатирав дека работничките имаат добри услови за работа. Таа е една од ретките фирми кои имаат добри услови за работа и ги почитуваат работничките права“, истакна Трајков.
Избрканата Пеншова во изјавата за ЦИВИЛ Медиа потенцира дека ќе пријави во полиција дека не ѝ е дозволен влез во фирмата иако за тоа има договор за работа. Таа смета дека причина за нејзиниот отказ е членството во здружението „Гласен текстилец“ кое ги застапува и се бори за правата на текстилните работнички.
„Ќе пријавам во полиција дека не ме пуштаат да влезам на работа и дека немам писмен отказ. Ако мислат дека ќе ме избркаат со „финтата“ – неоправдано отсуство од три дена, и со тоа автоматски – отказ, многу се излажале“, додава Пеншова.
Дехран Муратов