Џезаир Шаќири алијас „командант Хоџа“, нема да биде ангажиран како надворешен соработник во Владата на Република Македонија. Од почетокот на месецов тој беше во центарот на вниманието на јавноста откако се дозна дека е ангажиран за советник на премиерот Заев за борба со радикализмот, со договор на една година и месечна плата од 36.000 денари.
Напуштањето на функцијата Шаќири вчера го потврди во изјава за МИА, а потоа и премиерот Зоран Заев, кој рече дека одлуката била заеднички донесена.
– Медиумите во Македонија кренаа преголема врева за ова назначување. Единствениот политичар во Македонија што ми укажал некаква шанса е премиерот Зоран Заев и тој единствено ја има мојата почит. Не сакам заради ова Македонија да трпи на својот пат за ЕУ и НАТО. Ако мислеа дека ми е до тие пари, се лажат. Еве им ги назад, не ми се потребни, изјави Шакири за МИА.
Премиерот Заев подоцна во изјава за медиумите рече дека Владата е транспарентна и дека целта и била инклузивен процес и надминување на конфликтите од минатото.
– Луѓе кои во минатото се гледале низ нишан, сега работаат за својата земја Република Македонија. Но, истовремено сме и луѓе кои слушаат, а реакциите беа преголеми. Слушнавме што народот кажува, што кажа опозицијата која, исто така, беше критичка кон ова прашање. Разговаравме со Џезаир Шаќири и заедно донесовме одлука договорот да го раскинеме, изјави Заев за време на посетата на Битола.
Претходно, по првичните информации за назначувањето и реакциите по нив, Џезаир Шаќири на својот Фејсбук профил напиша дека „ја добил функцијата за да преживее“.
– Ниту сум избран за премиер, ниту за прв парламентарец. Едноставно се работи за функција за да преживеам. Секакви луѓе има во владата избрани на разни функции, а вие реагирате за мене, напиша Шаќири кој живее во Танушевци и во 2001 беше припадник и командант на ОНА.
Премиерот Заев, пак, на прес-конференција во понеделникот одговарајќи на новинарско прашање за вработувањето на Шаќири рече дека тој може многу да помогне доколку се појават одредени екстремистички или радикални групи на територијата каде што живее, каде што го познава теренот, а може, рече, да помогне и во градењето на концептот „едно општество за сите“. (МИА)