Медијаторот на Обединетите нации за спорот за името Метју Нимиц попладнево по средбата со лидерот на ДУИ Али Ахмети изјави дека имале конструктивни разговори, потенцирајќи оти секогаш добива добри совети од Ахмети.
– Разменуваме мислења за тоа како да се реши прашањето. Многу ги почитувам неговите ставови и секогаш добивам добри совети од него. Разговаравме и за тоа дека процесот напредува. Добив и уверување дека ќе игра конструктивна улога во напорите да се изнајде фер и разумно решение, изјави Нимиц по средбата.
Лидерот на ДУИ изјави дека му дава целосна поддршка на медијаторот во неговата мисија за решавање на спорот со името.
– Ние му даваме целосна поддршка на Нимиц во оваа многу знајачна мисија што ја има и се надеваме дека што е можно поскоро ова прашање да има епилог затоа што има големо влијание врз нашата иднина, но и врз мирот и стабилноста, изјави Ахмети,
Тој не сакаше да коментира за предлози за името, бидејќи, како што рече, тоа нема да му служи на процесот.
Покрај со Ахмети, медијаторот Нимиц денеска оствари средби и со државниот врв и со лидерот на ВМРО-ДПМНЕ, Христијан Мицкоски.
[divide]
Извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
