На денешниот работен појадок во Министерството за надворешни работи министерот Никола Димитров изрази благодарност за ангажманот на експертскиот тим предводен од Рајнхард Прибе што со прецизното детектирање на недостатоците во неколку клучни области, придонесе кон процесите за надминување на политичката криза. По појадокот, Прибе денеска имаше средби и во министерствата за внатрешни работи, за правда и за евроинтеграции. За денеска е најавена и средба со претставници на опозициската партија ВМРО-ДПМНЕ.
Вицепремиерот Бујани Османи посочи дека е потребна директна и отворена комуникација по однос на сите прашања кои треба да се решат, со цел меѓусебно разбирање, како основа за враќање на довербата на граѓаните во институциите.
„Свесни сме дека периодот на политичка криза, кој е веќе зад нас, влијаеше на темпото на реформите и спроведувањето на препораките од Извештајот на групата експерти од 2015 година. Во овој процес на исполнување на преземените обврски, од исклучителна важност за нас е вашето вклучување во овој процес, преку вашите совети, надзор и забелешки, имајќи предвид дека вашето име во моментов претставува и синоним за реформи во земјава. Јас, како и Секретаријатот за европски прашања, стоиме на располагање за сè што ви треба за објективна и точна проценка на состојбата. Клучно е да добиеме од вас јасни препораки за она што треба да биде преземено и што може да биде реализирано, на краток и среден рок“, рече Османи.
Министрите заедно ја истакнале цврстата заложба на Владата да ги адресира препораките од Извештајот на експертската група од 2015 и да ги спроведе мерките, предвидени со Акцискиот план за Итните реформски приоритети, со цел – Европската комисија да ја отстрани условеноста на препораката за почеток на пристапни преговори.
„На средбата беше изразено уверување дека натамошниот ангажман и идните насоки на експертската група ќе бидат од исклучителна помош за испорачување конкретни резултати во клучните области, со цел подобрување на животот на граѓаните и забрзување на европскиот интегративен процес на Македонија. Притоа, министерот Димитров и заменик-претседателот Османи, информираа за нашите активности, во насока на подобрување на односите и соработката со соседите, како еден од клучните приоритети во надворешната политика на Република Македонија“, се вели во соопштението од МНР.
Прибе ја нагласил неопходноста од засилен ангажман и мобилизација на релевантните институции во земјата за спроведување на препораките од Извештајот и Итните реформски приоритети и ја реафирмирал подготвеноста експертскиот тим да ѝ помогне на Македонија за надминување на посочените недостатоци во неколку важни области кои се однесуваат на владеењето на правото, слободата на медиумите и независноста на регулаторните тела.
