Полскиот премиер Доналд Туск рече дека полската влада се подготвува да ја стави достапна воената обука за сите возрасни мажи во земјата и дека иницијативата треба да биде готова до крајот на годината.
Туск денеска во парламентот изјави дека доколку Русија преземе контрола врз делови од Украина, тогаш Полска ќе се најде во „тешка географска ситуација“.
„Подготвуваме голема воена обука за секој возрасен маж во Полска. Нашата цел е да го финализираме планот до крајот на годината за да обезбедиме добро обучени резервни сили подготвени за потенцијални закани. Ако Украина ја загуби војната или ако ги прифати условите за мир, примирје или капитулација на таков начин што ќе го ослабне нејзиниот суверенитет и ќе му олесни на Путин да ја добие контролата над Украина, тогаш без сомнение – и сите ќе се согласиме за ова – Полска ќе се најде во многу потешка геополитичка ситуација“, рече Туск.
Зборувајќи подоцна за новинарите, Туск појасни дека не најавува продолжување на основната воена служба.
„Кога би предложил враќање на основната воена служба, би рекол. Имаме неколку модели. Еден од најценетите е швајцарскиот модел“, рече тој, додавајќи дека во вториот систем обуката „не е задолжителна, но има стимулации што ги тераат мажите да се одлучат за годишен тренинг“.
Во обраќањето во кое доминираше безбедноста, Туск исто така рече дека „Полска мора да ги следи најнапредните способности, вклучително и нуклеарно и модерно неконвенционално оружје.
„Ова е сериозна трка – трка за безбедност, а не за војна“, рече полскиот премиер.
Тој, исто така, изјави дека побарал од Министерството за одбрана да иницира повлекување на Полска од конвенциите со кои се забранува употреба на противпешадиски мини и касетна муниција, додавајќи дека „соочена со закана Полска ќе прибегне кон сите неопходни средства“.
Премиерот рече дека сите се свесни за сериозноста на ситуацијата, нагласувајќи ги случувањата поврзани со руско-украинската војна, трансатлантските врски и ситуацијата во Европа.
Тој рече дека Полска има „многу причини да биде многу фокусирана на безбедноста, на прашањата за војна и мир“, додавајќи дека многу гласови во Европа и САД „се приклонуваат кон рускиот наратив“ во врска со војната, иако тој рече дека ова останува „маргинална“ политичка позиција и во Полска и на Запад.
„Има само еден европски недостаток – неподготвеност да се преземе акција, несигурност и понекогаш дури и кукавичлук“, рече тој. „Сега е време да се дејствува.
„Сите во ЕУ, САД и Украина разбираат дека основната улога на Полска е да ја зајакне границата со Русија, а не да испраќа војници во Украина“, продолжи Туск.
„Нема причина Европа да се чувствува инфериорна во однос на Русија со оглед на разликите во популацијата и квалитетот на оружјето. Русија ќе биде беспомошна против обединета Европа“, рече Туск во парламентот.
Ј. Ѓ.
