Пред полната сала, актерите на Македонскиот народен театар, синоќа, ја одложија претставата „Ничија земја“.
Целиот актерски тим излезе пред присутните во МНТ и извинувајќи ѝ се на публиката соопшти дека во знак на протест за притворот на нивниот колега, Владо Јовановски, претставата нема да се одигра.
По ваквата одлука, публиката ја напушти салата.
Со одлука на Врховниот суд актерот Владо Јовановски, наместо куќен притвор, доби 30 дена притвор во Истражниот затвор „Скопје“ поради учество во крвавиот четврток во Собранието на 27 април.
Директорот на МНТ, Драган Спасов – Дац, на својот фејсбук профил синоќа реагираше на ваквата одлука на вработените.
„Пријатели и љубители на театарот, денеска се случи нешто што не смееше да се случи. Се откажа претстава во МНТ. Покрај мојата сугетија и наредба да се игра претставата, глумците своеволно одбија да ја играат претставата ‘Ничија земја’, како подршка за приведените глумци кои беа инволвирани во случувањата од 27 април во Собранието. Сите до еден ќе бидат казнети за непослушноста и по разговорот со мене свесни се за проблемот кој го направија“, стои во реакцијата на Спасов.
Тој во својата реакција додаде дека МНТ постои за публиката и дека така ќе остане.
„Ова го почувствував како атак кон мене и кон нашата публика“, напиша Спасов.
Во јавноста, пак, се шпекулира околу можните причини за откажување на претставата. Иако актерите беа децидни зошто ја откажуваат претставата, дел од јавноста откажувањето го поврза со условите во театарот, откако вчера, поради обилните дождови и градбите од Скопје 2014 коритото на Вардар се излеа на неколку места во центарот на градот.
Не е прв пат, театарот и околните новоизградени објекти покрај Вардар, како Уставниот суд и Архивот на Македонија, да прокиснат. На социјалните мрежи вчера се споделуваа видеа од Архивот на Македонија на кои се гледа како во кофи се собира водата која протекува.
Дел од јавноста со поддршка за актерите, другиот дел пак се прашуваат како досега актерите не излегоа на протест поради условите во коишто работат изминатите години.
Во Македонскиот народен театар денеска во 12 часот е закажана прес-конфереција на министерот за култура Роберт Алаѓозовски, неговиот заменик Владимир Лазовски и раководството на театарот поради прокиснувањето на објектот од дождот.
На прес-конференцијата, како што најави Министерството за култура, ќе стане збор и за откажувањето на синоќешната претстава „Ничија земја” од страна на актерите во знак на протест за нивниот колега Владо Јовановски.
М. Ивановска
