Меѓународниот ден на демократијата (15 Септември) денеска свечено ќе биде одбележан и во Собранието на Република Македонија.
Свое обраќање во законодавниот дом, попладне ќе имаат премиерот Зоран Заев, актуелниот и првиот претседател од Собранието, Талат Џафери и Стојан Андов, како и пратеничката од првиот парламентарен состав, Ѓулистана Марковска.
Меѓународниот ден на демократијата е можност да се разгледа состојбата на демократијата во светот и за потсетување дека демократијата е процес кој може да се оствари само со полно учество на меѓународната заедница, владите, граѓанското општество и поединците.
Годинава заложбите за демократија и за превенција на конфликти се фокусираат на потребата да се зајакнат демократските институции за промовирање на мир и стабилност.
Денеска се одбележуваат два јубилеја, 20-годишниот јубилеј од усвојувањето на Универзалната декларација за демократија на Интерпарламентарната унија и 10-годишнината од прогласувањето на Меѓународниот ден на демократијата.
ЦИВИЛ – Центар за слобода им го честита Меѓународниот ден на демократијата на сите граѓанки и граѓани, постетувајќи уште еднаш – дека борбата за демократија во Македонија не е завршена и повикувајќи ги сите институции да го почитуваат начелото за владеење на демократијата и правото во земјата.