Апелацискиот суд Скопје, по одржаната јавна седница по предметот познат во јавноста како „Поткуп“, донесе одлука со која го укина првостепеното решение и предметот го врати на повторно застапување на првостепениот суд.
„Во текот на постапката и одлучувањето по Предлогот на одбраната за издвојување докази прибавени со посебни истражни мерки, поставен на рочиште за главната расправа, првостепениот суд постапил спротивно на предвидената законска процедура кога по предлогот на одбраната за кој не постоела согласност од странките, наместо одлуката да биде донесена од Советот што бил во заседание, одлуката дополнително вон рочиште за главна расправа ја донел претседателот на советот со што во конкретниот случај излегол надвор од овластувањата утврдени со закон“, соопшти Апелација.
Во случајот „Поткуп“ осомничен е премиерот Зоран Заев за барање и за земање поткуп во висина од околу 160 илјади евра од струмичкиот бизнисмен Иван Николов-Сачевалиев, во врска со легализација на земјиште.
Адвокатите на Заев, претходно, од Кривичниот суд побараа да ги издвои овие снимки од доказниот материјал, но Судот го одби нивното барање и донесе решение тие да бидат доказ, по што поднесоа жалба до Апелацискиот суд. Одбраната и Заев бара снимките да не бидат доказ бидејќи веќе биле објавени во јавноста, односно делови од нив биле ставени на видеосервисот „Јутјуб“, а потоа преземени и објавени од медиумите. Исто така, одбраната се жалеше дека не постои наредба за користење агент-провокатор, како и дека не добиле увид во целосната снимка од ПИ-мерките.
Д.М.
