Колумните на Сашо Орданоски што ги објавуваа ЦИВИЛ Медиа, а беа пренесувани во Плусинфо и Слободен печат, секој работен ден, почнувајќи од 4 септември 2017 година, сега се објавени во обемното издание на ЦИВИЛ под наслов „Во чекалницата на слободата“.
За колумните на Орданоски рекоа:
Ѓунер Исмаил: „Во нормалниот свет, денот никогаш не започнувал со изгревањето на сонцето, туку, како што велел Хегел, со читање на весници, што се подразбирало како утринска молитва. Денот, Светот, а особено умот на цивилизираниот граѓанин со весниците ја добивале неопходната светлина, неопходниот кислород за да ја издржиме, та дури и за да ја разбереме сета авантура на живеењето, особено во општество како нашето. Среќа е што Сашо, со исклучителна компетентност, се нафати во годинава зад нас да ни биде токму тоа: да го активира нашиот будилник, да го запали светлото „на крајот од тунелот“, да ни обезбеди неопходни дијагнози и по некој лек, да ни помогне да си ги протриеме гуреливите очи и, ако сме доволно храбри, да се впуштиме во дневните битки со Сцилите и Харибдите кои, најчесто, сами си ги произведуваме…
Брзам да завршам, часот е осум-нула-нула, тајмерот ме предупредува дека Сашо и денеска е објавен на civilmedia.mk!“
Џабир Дерала: „Едноставно е. Сашо е барометар на нашето општество. Најдобар автор. Неповторлив.“
Бранко Героски: „Орданоски е врвен аналитичар на политичките прилики во Македонија, неговите анализи се неодминливо четиво за секој што сака да копне под површината на дневните настани и сензации. Ги препорачувам и како задолжителна лектира за секој политичар што претендира на влијание и моќ.“
Бранко Тричковски: „Колумнистиката на Орданоски е ѕвезда во мрачната вселена на македонската транзиција. Светлост што ни помага да видиме што се случува зад појавноста на нештата. Одело за нуркање, скафандер за леонирање. Луѓето што не прочитале макар една колумна од Сашо, немаат право да кажат дека ја разбрале Македонија.“
Санта Аргирова: „Повеќе експлозивен коктел наместо утринско кафе, прецизен дневник на општествените настани. Прирачник за почетниците во политиката.“
Слободан Унковски: „Орданоски е симултан преведувач на животно загрозувачките болести што македонското општество ги имало, ги има и евентуално ќе ги добие. Со неговите колумни, кој знае да препознае, доаѓа и рецепт за лекот, што, за жал, го нема на позитивната листа.“
Гордана Дувњак: „Орданоски е поразличен од сите останати. Тој провоцира со актуелноста во изборот на теми, вештината во пласирањето и одбраната на тезите, сочниот јазик што го користи. Наметнува дилеми, полемизира, но и нуди решенија. Тоа не му успева секому, туку само на оној што умее да ги подреди и анализира фактите, а притоа, има и животно искуство, широк светоглед и бројни контакти.“
