„Националистичка кампања на ќосињата“ и „Цаневска: Заканите кон моите деца нема да им поминат“ се две стории што зборуваат за говор на омраза, притисоци и закани. И двете иницијално се поврзани со ликот на Андон Лазов Јанев -Ќосето.
Првата вест доаѓа од граѓански новинар на чиј автомобил, како и на други автомобили што биле на паркингот во Гратскиот трговски центар во Скопје, била оставена порака „Не купувајте од шиптаришта, потпис Ќосето“.
Втората вест е за говор на омраза и отворена закана преку социјалната мрежа Фејсбук, поттикнати од статусот на Катерина Цаневска. Таа ја поздравува ноќната акција на тргање на споменикот на Ќосето поставен кај скопските судови.
ЦИВИЛ Медиа упати неколку прашања до Министерството за внатрепни работи, што се однесуваат на двата случаи.
За Цаневска прашањата беа во контекст на пријави на случаи за говор на омраза преку социјаните мрежи. Прашањата беа колку случаи се пријавени во МВР, за колку е покрената постапка и дали постои пракса на следење на вакви случаи по дојава.
За националистичката кампања прашењто до МВР беше дали воопшто имаат сознанија за овој случај, има ли пријава од некого и дали би презеле нешто.
Прашањата се поставени телефонски, а по барање на МВР и на електронска пошта. И покрај коректноста во телефонските разговори, сепак повеќе од 72 часа сè уште се чека на одговор.
За дел од прашањата, Секторот за односи со јавноста треба да добие повратен одговор од Сектор за компјутерски криминал и дигитална форензика. Сепак, колку време им треба од овој Сектор за одговор не знаеме, затоа што не можеме да ги добиеме.
Што се однесува до транспарентноста на МВР, за поздрав е нивната коректност и отвореност кон медиумите и граѓанското општество, но кога ќе се побара информација се очекува истата и да се добие. Можеби МВР треба да поработи на меѓусекторските односи и да бидат поажурни во одговрите на прашања што се од јавен интерес.
Б. Јордановска