Денеска (28 септември) е Меѓународниот ден за правото на знаење. Овој ден на граѓаните од целиот свет, всушност, им ја дава можноста за промовирање и дискусија за отворени прашања до владите. Им дозволува на граѓаните пристап до информациите, што се во надлежност на владите, на државните институции и на јавните претпријатија. Слободата на информациите или правото на јавноста да дојде до точна информација – е клучен столб на демократијата. Но, многу земји во светот не успеваат да живеат според овој стандард.
Во изминатата година, неколку земји во светот усвоија нови закони за слобода на информации, но правилното спроведување на овие закони останува предизвик, како и секогаш.
И покрај постоење на Закон за слободен пристап до информации од јавен карактер, новинарите, медиумите и граѓаните на Македонија, изминатава деценија тешко доаѓаа до вистината и до точна информација од претходната Влада и од државните институции, како на централно, така и на локално ниво.
Многу медиуми под силен притисок на власта беа затворени, а новинарите оставени без егзистенција. Многу новинари беа жртви и на физичка тортура, притворани, новинарски екипи беа мета на напади на одделни структури во општеството, блиски до власта.
Загрозувањето на правото на граѓаните и јавноста на точна, вистинита и објективна информација, беше причина за основање на Советот за етика на медиумите, како тело кое што ќе ја буди свеста кај новинарите и медиумите за саморегулација.
Агенцијата за аудио и аудио визуелни медиуми, како регулаторно тело кое што има обврска да ја мониторира работата на медиумите, по доаѓање на новата власт, од крајот на мај годинава, ги зеде повторно законските ингеренции во своите раце.
Невладината организација ЦИВИЛ-Центар за слобода, којашто будно ја следи работата на медиумите, спроведува проект „Слободни медиуи-слободно општество“, давајќи огромен придонес во процесот на остварување на ова елементарно човечко право – Правото да се знае.
28 септември е предложен за Меѓународен ден на правото на знаење во 2002 година, на состанокот на организациите за слобода на информации од целиот свет во Софија, Бугарија.
Целта е да се подигне свеста за правото на луѓето да пристапат до информациите на владите, истовремено промовирајќи слобода на информирање, што е од суштинско значење за демократијата и за доброто владеење. Организациите кои се застапуваат за слобода на информации ширум светот, оттогаш го одбележуваат датумот со активности за прослава и подигнување на свеста за правото на информирање.