На денешната седница на Владата на Република Македонија е одлучено да се иницира постапка за разрешување на Јавниот обвинител на Република Македонија, Марко Зврлевски. Во соопштението се вели дека Владата донела одлука за предлогот за разрешување на републичкиот јавен обвинител, поради незаконско и ненавремено извршување на функцијата и, согласно законските одредби, да го достави до Советот на јавни обвинители и да побара мислење.
Според законските процедури, Владата – по претходно мислење од Советот на јавни обвинители, до Собранието поднесува предлог за разрешување на Јавниот обвинител на Република Македонија. Јавниот обвинител може да се разреши од фукнцијата пред истекот на мандатот поради: незаконито, ненавремено или недоволно стручно вршење на функцијата, ако со своето однесување и дејствување покажува дека не е способен за извршување на функцијата, ако не поднесува барање за покренување кривична постапка во случаи предвидени со закон и поради нарушување на угледот на функцијата.
Советот е должен во рок од 15 дена да ѝ одговори на Владата со позитивно или негативно мислење.
На денешната седница на Владата разрешен е досегашниот директор на Службата за општи и заеднички работи на владата Васе Доневски, а за нов директор е именуван Пеце Мирчески.
На седницата на Владата се разгледани и првичните информации за последиците од невремето во тетовско, поради излевањето на Поројска Река и задолжени се повеќе надлежни министерства за брзо формирање комисија која што ќе излезе на терен за брзо утврдување на настанатите штети. Истовремено, дадено е задолжение на министерствата за транспорт и врски и за животна средина, да изготват подетална информација за теренската состојба околу Поројска Река, со цел трајно решавање на проблемот за жителите од овој реон.
