Кандитатите за градоначалници или кандитатите за советници на Локалните избори закажани за 17.10.2021 година, како да се во трка со изборната кампања, односно временски се пред неа.
Иако изборната кампања започнува 20 дена пред денот на изборите, дел од актуелните кандидати се сѐ повеќе и сѐ помасовно присутни, особено со сопствено интернет претставување преку видео презентации.
Сепак, за останатите облици и манифестации на изборната кампања (како јавно собирање, медиумско претставување, истакнување на плакати, дистрибуција на флаери и друг печатен материјал), кандидатите како да го чекаат официјалниот, законски, почеток на изборната кампања.
Чекањето на законски предвидениот рок за започнување и завршување на изборната кампања, како да станува исклучок.
Кандидатите се во постојан обид за изнаоѓање на наводно суптилни, а сепак толку очигледни, начини за себепромовирање и себепретставување, далеку пред регуларниот почеток на изборната кампања.
Влезени во својата предвремена изборна кампања, кандидатите го игнорираат законски предвиденото и точно определено времетраење на изборната кампања.
А покрај игнорирањето на утврдената временска рамка на изборната кампања, кандидатите, случајно или намерно, како да забораваат и на нивната законска можност да поднесат приговор до Државната изборна комисија (ДИК) за евентуалното непочитување на роковите на изборната кампања, од страна на другите кандидати-учесници во изборната кампања.
Па така, се добива впечаток дека предвремената изборна кампања е прифатена од кандидатите, и тоа како од активните, така и од пасивните (или барем привидно пасивните).
На крај, ваквото однесување на кандидатите, односно нивната предвремена изборна кампања не е санкциониранa како прекршок со одредбите од Изборниот законик, според кој, нелогично, предвидена е глоба само за правно лице ако не го почитува рокот за започнување и завршување на изборната кампања.
Сандра Гавриловска
Експертски борд на ЦИВИЛ
