ВЕСТ НА ДЕНОТ: Сеќавања на 27 април, најцрниот датум во историјата на македонската демократија
На 27 април – „Крвавиот четврток“ околу 300 лица насилно упаднаа во Собранието со цел да го спречат изборот на Талат Џафери за претседател на Собранието на Република Северна Македонија. Покрај насилството и упадот во Собранието, Талат Џафери беше реизрбан, со што неговиот избор беше признат од САД, Европската Унија и дел од меѓународната заедница.
Четири години подоцна, пратениците кои беа нападнати во Собранието ја потсетуваат јавноста за тоа што се случи на овој ден.
Министерката за одбрана, Радмила Шекеринска, за време на својата посета на „Криволак“, упати порака дека колку и нечии ставови да се различни, таа во Парламентот ги почитува, повикувајќи на сите пристојни луѓе да ја повлечат црвената линија на своите партии, бидејќи како што кажува таа, на тој ден биле на чекор до смртта.
„Да бев како нив, ќе им посакав се да им се врати. Ама не сум и никогаш нема да бидам. Не посакувам тоа зло повеќе никому да му се случи. Не посакувам никогаш човек на човек да крене рака. Ја напуштив политиката и повторно ќе се обидам да заборавам, ама никогаш нема да им простам. А на оние изгубени политичари кои го организираа и присуствуваа на протестот во неделата, сакам да им порачам дека следниот пат кога ќе се видиме нема никаква потреба да ми викаат здраво…“, напиша Дамјан Манчевски, поранешен пратеник и министер за информатичко општество.
Вицепремиерот за борба против корупцијата, Љупчо Николовски за ЦИВИЛ МЕДИА изјави дека насилсниците не се и не може да бидат уставобранители.
„Денеска, четири години од упадот во Собранието на 27 април, се уште се свежи сеќавањата на тој крвав четврток и велиме да не се заборави за никогаш да не се повтори. Се уште ја паметиме неизвесноста, тензиите, насилството, дупнатите глави… ама и одлучноста да не отстапиме од борбата за подобра иднина на народот, дури и кога нашите животи беа загрозени“ – изјави Николовски.
Министерот за внатрешни работи, Оливер Спасовски напиша: „Четири години од крвавиот четврток, ден на едно мрачно сценарио во режија на тогашната режимска власт, кога беше организирана и спроведена акција со единствена цел – убиство, човечко, но и на надежта за иднина на државата. Сосема спротивно од нив, ние бевме подготвени да ги дадеме своите животи во одбрана на нашата цел – слободна, демократска држава, на сите граѓани, со можности еднакви за сите, со стабилни институции кои се во служба на граѓаните“, вели тој.
Премиерот Зоран Заев објави: „Сите обиди да се бришат белезите низ кои е запаметен 27 април 2017 година како најмрачен ден во поновата македонска историја се залудни и се израз на апсурдната и бесмислена намера да се прикажат како патриотизам дивеењата низ храмот на демократијата. Опасни и антинародни се обидите тепањето и влечењето по подот пратеници претепани до бесознание и насилството врз новинарите да се прикажува како одбрана на Устав. Тој ден се обидоа да го погазат народот и да ја доведат државата на работ на граѓанска војна само за да ја одбранат политичката иднина на човекот кој потоа истите тие свои следбеници ги осуди и избега од правдата. Нема ништо да го избрише, ниту да го смени фактот дека на 27 април 2017 година, имаше организирана и со насилство спроведена монструозна акција од лидерите на тогашната владејачка партија кои беа решени да се задржат на власт по секоја цена, без најмало чувство за одговорност и за последиците на нивните мрачни амбиции.“
ИЗЈАВА НА ДЕНОТ Богоевски: Не смееме да го заборавиме 27 април, бидејќи така ќе ни се повтори
„Таа вечер не беа цел само пратениците. Беа цел и медиумските работници, беше цел и персоналот на Собранието, а во најширока смисла на зборот, беше цел и целата држава. Не смееме да заборавиме дека вистинската цел на 27 април беше заканата дека имаат реална намера да предизвикаат вистинска граѓанска војна која засекогаш ќе го променеше ликот на нашата држава и општеството. Поради тоа, пораката е: Не смееме да заборавиме, бидејќи така ќе ни се повтори“ – изјави Павле Богоевски за ЦИВИЛ МЕДИА.
ФЛЕШ ВЕСТИ
КРИВИЧНА МВР му поднесе кривична пријава на Тодор Петров, претседателот на Светскиот македонски конгрес, затоа што го организирал неделниот протест за „поддршка на уставобранителите“ во време на пандемија, објави Слободен Печат.Станува збор за кривична пријава поради непочитување на мерките за заштита на населението од заразни болести.
СРЕДБА Европската перспектива на земјата, реформската агенда и справувањето со КОВИД-19 главни теми на денешните средби на претседателот Стево Пендаровски со потпретседателот на Европската комисија и висок претставник за надворешна и безбедносна политика на Европската Унија, Жозеп Борел и со претседателот на Европскиот парламент, Давид Сасоли во Брисел.
ПРАШАЊЕ Денеска четири години по 27 април, лидерот на Алијансата за Албанците, Зијадин Села го посети Фета Халими во затворот Идризово. Села јавно го праша лидерот на ДУИ, Али Ахмети, кој е висок функционер на оваа партија, кој на 27 април 2017 година го информираше Груевски за изборот на претседател на Собранието.
МЕРКИ Од утре, 28 април (среда), забраната за движење на населението и на возила од јавен превоз на целата територија на државата, наместо од 20:00 ќе важи од 21:00 до 5:00 наредниот ден. Исклучок од забраната и посебниот режим на движење се вечерните часови меѓу 1 и 2 мај, односно за време на верскиот празник Велигден, и вечерта меѓу 13 и 14 мај за време на верскиот празник Рамазан Бајрам.
ОДЛУКА Премиерот Зоран Заев денеска соопшти дека ги слушнал аргументите на инспекторите и детално ќе ги прочита материјалите што му ги доставиле пред носењето на одлуката околу разрешување на директорот на Државниот пазарен инспекторат, Стојко Пауновски на денешната владина седница.
ВАКЦИНИ Според последната информација од вчера, кинеските вакцини на 28 април треба да тргнат од Пекинг кон Истанбул, на 30-ти од Истанбул во Белград и оттука најверојатно или на 30-ти вечерта или на 1 мај со специјални камиони ладен ланец ќе пристигнат во Скопје, по што ќе ги сместиме во ладната соба во поликлиниката „Јане Сандански“, изјави денеска министерот за здравство Венко Филипче.
ОБРАЗОВАНИЕ Министерството за образование и наука демантира дека се откажува од донесување нов закон за учебници и други наставни и дидактички материјали со кој се нудеше и можност за дигитализација и укажува дека го повлекло од собраниска процедура само заради дополнување на делот за усогласување со европските документи. МОН најавува дека законот ќе биде денеска на седница на Влада и оти потоа повторно ќе биде вратен во Собрание.
СЛОБОДНА ЗОНА
Луѓе од „пи-арот“ или односите со јавноста ќе ви кажат дека Земјата е округла и дека за тоа може да прочитате во современите учебници и научни трудови, ќе ви дадат линкови до документарни филмови и до институции каде што ќе се уверите и самите во вистинитоста на таа изјава. И отворени се за прашања и дискусија, без оглед на тоа колку се непобитни фактите.
Пропагандата ќе одговори дека Земјата е рамна и дека сите што тврдат поинаку ќе горат на клада, бидејќи се зли предавници на исконските човечки вредности. Исклучуваат секаква дискусија или ја сведуваат на дискредитација на изворите, со „аргументи“ од типот: „Сето тоа е заговор на Западот“, „Библијата не вели така“, „Масоните, Евреите, Сорос, Меркел, Бил Гејтс и Заев лажат“… пишува Џабир Дерала во рафалот Има разлика.
„Но, откако стана јасно дека Владата не сака да ја менува односната политика, Пауновски реши дека тој ќе ја менува Владата. Оти, ако поради него владата не си дава оставка, освен да биде сменет од функција, Пауновски има и можност самиот да си даде оставка, со оглед на несогласувањето со владината политика – за него е сеедно, бидејќи во кој било случај, веќе е акламативно прогласен за херој во јавноста, па ако нема намера да ја смени Владата, логично би било самиот да си замине од неа. Па, сепак, не.
Како и да ја заврти, Заев е во губитничка позиција. Доби уште еден „Стојко“ во рабушот на јавноста која обожува државни функционери кои, од некаков принцип, им пркосат на помоќни државни функционери. Има и иронија во сето тоа, бидејќи ако некој пркосел во политиката, тоа е секако Заев, па таа политичка емоција би требало добро да ја познава. Сепак, работата со Пауновски гледаме до каде стигна, ни телефон инспекторов, од инает, на премиерот не му крева…
Ништо. Ќе лета, изгледа, Стојко во пилоти. Ќе си ја исполни својата дамнешна желба“, пишува Сашо Орданоски во денешната колумна Стојко лета во облаци.
„Не може да си бил дел од Шарената револуција, а да го поддржуваш 27 април. Вредносно, логички, рационално гледано е невозможно.
Но е возможно – за опортунисти, кариеристи, сончогледи, мразачи, лицемери…луѓе без кичма, вредности, луѓе аморфни, кои лесно се вклопуваат во секоја наредна „мода“, макар било тоа оправдување на омраза и насилство.
Таквите, што „не се бавеа со политика“ а беа послушни шрафчиња и алатки за „хуманизирање“ и давање „човечки лик“ на една десетгодишна диктатура, почнаа да доаѓаат на протестите против режимот на Груевски пред самиот негов крај. За да бидат видени, сликани, да фатат „приклучок“, ред за „баци-рака“. Тие најгласно викаат дека некој се „ухлебил“, „вдомил“…оти тој им е светогледот и дометот.
Ваквите луѓе се најголема рак-рана за секоја власт во Македонија, 30 години наназад. Тие се секогаш меѓу првите за бркање врски, услуги, и најгласни ако не бидат примени преку ред.
И некни го правеа тоа. Само, овој пат, се пресметале погрешно, и прерано фатиле „приклучок“. Нивниот 27 април, тоа дивеење, жед за крв, насилство, владеење на криминалот и омразата, никогаш нема да се врати назад“, пишува Петрит Сарачини во колумната Ем на шарена револуција, ем поддршка за крвниците од 27 април?.
Д. Муратов
