Пред два дена на социјалната мрежа Фејсбук се појави лажен профил со името и презимето на градоначалникот на општина Чашка, Горан Стојановски (Goran Stojanovski), преку кој се ширеше говор на омраза по етничка основа, најверојатно со цел да се предизвика меѓуетничка нетрпеливост. За таа цел ја злоупотребија трагедијата во Бугарија во која загинаа 45 македонски граѓан(к)и.
Градоначалникот на општина Чашка, Горан Стојановски преку својот официјален Фејсбук профил истакна дека содржината која е истакната денес и вечерва со навредлива содржина околу несреќата во Бугарија не е негова и дека се работи за лажен профил.
„Доставив барање до МВР веднаш да го испитаат случајот кој тоа го сторил и кој го контролира лажниот профил со латинична подршка кој ми нанесува штета и углед по моето име и презиме како Градоначалник на општина Чашка. Упатувам барање и до МВР и до ОЈО веднаш да превземат мерки да го најдат сторителот и истиот најостро да го санкционираат, вели Стојановски.
Пред неколку дена градоначалникот на општина Чашка го честиташе Денот на албанската азбука.
Ваквите лажни профили имаат за цел да ја дестабилизираат безбедноста, да предизвикаат верска и етничка нетолеранција, да ја нарушат хармонијата и соживотот.
ЦИВИЛ ги повикува граѓан(к)ите да не подлегнуваат на вакви провокации, лажни профили и дезинформации. Исто така ги повикува и надлежните органи како што се ОЈО и Сектор за компјутерски криминал и дигитална форензика при МВР, веднаш да го/ја лоцираат и санкционираат тој/таа што го злоупотреби идентитетот на градоначалникот на општина Чашка, Горан Стојановски, за ширење на говор на омраза и етничка нетолеранција преку социјалната мрежа Фејсбук.
Мониторинг тим на ЦИВИЛ