Предлогот за целосен и безусловен прекин на огнот во траење од 30 дена останува без одговор од Русија веќе 39 дена. Соединетите Американски Држави го поднесоа овој предлог, Украина одговори позитивно, но Русија го игнорираше, изјави украинскиот претседател Володимир Зеленски на социјалните мрежи.
„Доколку Русија сега, веднаш, е навистина подготвена да се вклучи во формат на целосен и безусловен прекин на огнот, Украина ќе делува соодветно – одговарајќи реципрочно на акциите на Русија. Тишина за тишина, одбранбени удари за напад. Доколку навистина се воспостави целосен прекин на огнот, Украина предлага тој да биде продолжен и по Велигден, 20 април“, напиша Зеленски.
Само на тој начин, според украинскиот лидер, може да се согледаат вистинските намери на руската страна.
„Тоа ќе ги открие вистинските намери на Русија – бидејќи 30 часа се доволни за насловни страници, но не е за вистински мерки за градење доверба. Триесет дена би му дале шанса на мирот“, тврди Зеленски.
Тој ја извести светската јавност дека руското артилериско дејствување не е запрено. Тоа можеше да се утврди и на онлајн апликациите за следење на воените дејствија во Украина. На пример, во текот на целиот ден имаше извештаи дека рускиот агресор дејствува со пешадија и отвора артилериски оган во Харкивската и Днипропетровската област.
„Според извештаите на Главниот командант, руските офанзивни операции продолжуваат на неколку делови од фронтот, а руското артилериско дејствување не е запрено. Затоа, нема доверба во зборовите што доаѓаат од Москва. Премногу добро знаеме како Москва манипулира и сме подготвени на сè. Одбранбените сили на Украина ќе делуваат рационално – соодветно на ситуацијата. Секој руски напад ќе добие соодветен одговор“, пишува украинскиот претседател Володимир Зеленски и додаде дека очекува детални извештаи во 21:30 и 22:00 часот од Главниот командант Олександр Сирски, по неговите разговори со командантите на бригадите и други единици на фронтот за состојбата во конкретни правци.
Оваа информација ја сподели и украинската амбасадорка Лариса Дир на Х.
Претседателот на Украина, г-дин Володимир Зеленски: pic.twitter.com/RQMtZGoEsc
— Larysa Dir (@dir_larysa) April 19, 2025
Путин ненадејно објави 30-часовен прекин на огнот, иако претходно 39 дена го игнорираше планот за прекин на огнот што го понудија САД, а претседателот на Украина го прифати. Притоа, иако Путин објави 30 часовен прекин на огнот, руското оружје не мирува, како во споменатите Харкивска и Днипропетровска област, така и во Кијив над кој се појавија руски ударни дронови во текот на денот.
Објавата на еднодневниот прекин на огнот доаѓа по изјавата на американскиот претседател дека САД ќе се откажат од тоа што тој го подразбира под „мировен процес“. Путин очигледно прави само уште еден пи-ар маневар пред светската и руската јавност, во обид да се прикаже како миротворец. А пред само една недела, на Цветници, две балистички ракети усмртија 35 цивили и ранија 117 во центарот на Суми – најсмртоносен напад врз цивилни цели од почетокот на оваа година.
Џ. Д.
