Eвропската унија го објави вториот извештај на експертската група на Рајнхард Прибе, која што во јули беше во посета на Македонија, во однос на владеењето на правото. Според извештајот, од суштинско значење е СЈО да продолжи со кривичното гонење на одговорните за нелегалното прислушување, зашто без осуди се создава перцепција за неказнивост во јавноста!
„Утврдувањето на кривичната одговорност за нелегалното прислушување е од суштинско значење и мора да продолжи да се спроведува. И покрај критиките, опструкцијата и некооперативниот став на широк опсег на клучни институции, вклучувајќи го и обидот на претседателот да ги помилува сите, дури и оние што потенцијално би биле под истрага, СЈО сепак покажува посветеност и компетентност. Сепак, ограничувањата и опструкциите на мандатот на СЈО го покренуваат прашањето за континуитет што е од суштинско значење за обезбедување на кривична одговорност. Постојат различни опции за да се обезбеди овој континуитет. Силна правна основа, за ова е неопходна“, стои во новиот Извештај на експертската група на Прибе.
Според експертите од тимот на Прибе, судот не постапува ажурно по предметите, кои што ги добива од СЈО, а од 20 поднесени обвиненија, потврдени се само три!
Според Прибе, иако поминаа две години, никој не е осуден по обвинение на СЈО, со што се создава перцепција за неказнивост. Од суштинско значење е да се обезбеди кривична одговорност на сите наводни сторители, без оглед на политичката припадност, а кратките рокови за поднесување обвинение според Законот за СЈО, им ја оневозможува работата на обвинителите.
„Одредбата од член 22 од Законот за СЈО, дозволува многу кратко време за истраги од 18 месеци. Ова е сериозна пречка за континуитетот и правдата“, вели Прибе. Затоа се бара овој спорен член да се усогласи со одредбите на Законот за кривичната постапка, а Прибе препорачува СЈО да се припои кон Републичкото јавно обвинителство, како специјализирано одделение.
Владата со соопштение ја поздрави работата на експертската група на Прибе за системски прашања од областа на владеењето на правото. На денешниот втор Извештај, Владата гледа како на продолжение на Извештајот на Прибе од 2015 година.
„Владата целосно се согласува со констатацијата дека во периодот 2015-2017 година, многу малку работи се подобрени во областите од Извештајот. Токму во првите 100 дена од работењето, новата Влада успеа да ги согледа овие проблеми и, загрижена за досегашното загубено време и шанси, изработи реформски ‘План 3-6-9’, кој веќе опфаќа дел од проблемите утврдени во новиот Извештај на експертската група на Прибе, и отвара пат за нивно решавање. Истакнуваме дека Извештајот на Прибе објавен денеска, ќе го искористиме како насока за надградување и подобрување на ‘Планот 3-6-9’, како и за определување на приоритетните мерки за наредниот период. Плановите на Владата ќе се прават врз основа на соодветни анализи и во отворен и инклузивен процес со Собранието, опозицијата и граѓанското општество“, соопштуваат од Владата.
