Властите во Молдавија приведоа 74 лица обвинети за заговор за поттикнување немири за време на парламентарните избори во земјата на 28 септември, објави локалниот медиум NewsMaker на 22 септември, пренесува Кијив Индипендент.
Осомничените се обвинети за соработка со руските разузнавачки служби за организирање масовни немири за време на изборниот период. Според полициското соопштение, групата се обидела „да создаде хаос и да ја поткопа довербата во изборниот процес во Република Молдавија“.
„Крајната цел на овие акции е да се поткопа внатрешната стабилност и изборниот процес, со цел да се засили влијанието на Руската Федерација и да се ослабне довербата во демократските институции во Република Молдавија“, се вели во полициското соопштение.
Истражителите рекоа дека осомничените редовно патувале во Србија, каде што биле обучени од руските разузнавачки служби за употреба на огнено оружје, специјална опрема и тактики за предизвикување насилство за време на протестите. На учесниците наводно им биле платени околу 400 евра.
Истрагата започна во јули 2025 година, кога молдавските власти започнаа голема национална операција поради сомнителни активности за дестабилизација. Деталите од истрагата беа презентирани на прес-конференција организирана од полицијата, Обвинителството за борба против организираниот криминал и Службата за безбедност и разузнавање (СИС).
Директорот на СИС, Александру Мустеата, рече дека саботажната операција била надгледувана од Андреј Павлов, руски разузнавачки агент кој наводно ги координирал напорите за дестабилизација со помош на протераниот прокремљски олигарх Илан Шор. Павлов е поврзан со слични кампањи за влијание во Европа, Азија и Африка, рече Мустеата.
За време на истрагата, која вклучуваше повеќе од 200 претреси на 22 септември, властите запленија оружје, муниција, шатори, пасоши и други докази.
Доколку бидат осудени, осомничените се соочуваат со затворски казни од четири до осум години.
Кишињев постојано предупредува на обидите на Москва да ја дестабилизира земјата, а неодамнешните извештаи од Блумберг и Би-Би-Си детално ги опишаа плановите на Кремљ да се меша во парламентарните избори и да го наруши патот на Молдавија кон членство во Европската унија.
Д. Мишев
