Советот на родители на учениците од Основното училиште „Мирче Ацев“ во долненското село Лажани, одлучи да го прекине бојкотот на наставата на околу 270 деца, откако добиле повторно ветување од Општината Долнени, дека итно ќе се санираат клучните проблеми во објектот каде се одржува наставата.
„На средбата со претставниците од Општината, добивме гаранции и веќе се во тек активности за изолација на каблите за струја, а имаме ветување дека викендов ќе финишираат и активностите за ставање на гумени подови во две училници каде засега ќе се изведува наставата. Им дадовме рок до понеделник. Доколку ветувањата и овој пат не ги исполнат, ќе преминеме на радикални чекори. Бидејќи нашите барања се од ноември, а Општината и градоначалникот ги заборавија ветувањата, па бевме принудени на бојкот“, вели Мирсад Колашинац, претседател на Советот на родители.
И надлежните од Општина Долнени потврдуваат дека бојкотот на наставата е прекинат и дека до понеделник, реално ќе има услови за настава во две училници.
„Поголеми зафати во моментов, не можеме да преземеме. Но, се договоривме по средбата со родителите, да бидат изолирани каблите за струја, инвестиција од околу 1.500 евра и да се стават гумени подови во две училници, вкупно ќе се потрошат околу 3.000 евра. Во понеделник, учениците ќе може да следат настава во нормални услови“, изјавија надлежните од Општина Долнени.
Учениците од Лажани ја бојкотираа наставата од почетокот на неделава.
М. Талеска