Незадоволната група од редовите на Демократската унија за интеграција (ДУИ) предводени од пратеникот Изет Меџити, и други партиски и владини функсионери денеска на прес-конференција претставија анализа и го повторија своето незадоволство од работењето на дел од министрите во Владата и побараа одговорност за тоа. Тие се пожалија дека нивните забелешки не биле разгледани во партијата, поради што се одлучиле да ги споделат со јавноста, членството и со гласачите.
Меџити истака дека го избрале овој начин на делување, бидејќи во партијата им било кажано дека повеќе нема да има средби за ова прашање. Анализата содржеше оценка за реализацијата на 170 ветени предизборни проекти за периодот 2020-2022 година.
„По наше барање пред три месеци, започна институционалното функционирање на партиските органи, се отвори дискусија за отчетност, по две средби работата во раководството се прекина. Нашите забелешки за нереализирање на програмските ветувања за изборите од 2020 година не беа земени предвид, а состаноците беа затворени без никаква одлука. Затоа решивме да се обратиме до членството, гласачите и јавното мислење за состојбата на ДУИ“, рече Меџити.
Според него, донесувањето на одлуки во партијата станало ексклузивна привилегија за Артан Груби, што не оди само на штета на партијата, туку и на државата.
„Од 170 заложби, само две се целосно спроведени, а пет се делумно спроведени. Додека другите се заборавени од извршната власт на ДУИ. За неуспесите на владините проекти сведочи и анкетата на меѓународната организација ИРИ, па ако сме ние субјективни, на крајот токму американската ИРИ ги даде резултатите каде Артан Груби и Бујар Османи имаат најслаби перформанси и за првпат рејтингот на албанската опозиција го надминува рејтингот на ДУИ“, изјави Изет Меџити, потпретседател на ДУИ.
Понатаму рече дека нема да се формира нова политичка фракција и нема да бара лична одговорност од претседателот Али Ахмети. Според нив, одговорноста е на министрите и тие се оние кои треба да бидат разрешени.
Меџити потенцираше дека го поддржуваат курсот на Владата, членството во НАТО и напорите за влез во ЕУ.
„Сѐ она што се однесува за стратешките договори со ЕУ, Бугарија, сѐ што ќе биде предложено како добар закон во Собрание, што е од интерес на граѓаните, ќе ги гласаме“, рече Меџити.
Ваквата реакција доаѓа откако оваа група во ДУИ, успеа да издејствува да се формираат партиските тела кои, според нив, долго време беа нефункционални.
Н. А.