Украина преживеа уште една непроспиена ноќ под масовен руски напад со беспилотни летала и ракети. Во текот на ноќта и утрото на 8 јули, руските сили нападнаа повеќе украински региони, меѓу кои Харкив, Кијив, Запорижја и Чернигивската област. Украинските власти соопштија дека има загинати и повредени цивили, меѓу нив и деца, како и оштетени станбени објекти, јавен превоз, инфраструктура и цивилни објекти.
Амбасадорката на Украина во Северна Македонија, Лариса Дир, во објава на платформата X порача дека секој навремено испорачан систем за противвоздушна одбрана значи спасени животи.
„Уште една непроспиена ноќ за Украина. рф изврши масовен напад врз Харкив, Кијив, Запорижжја и Чернигивската област. Има загинати и повредени, меѓу нив и деца. Секој навреме испорачан систем за противвоздушна одбрана за Украина значи спасени животи и заштитени украински градови. #StopRussia“, напиша Дир.
Според украинските воздухопловни сили, Русија во нападот употребила 169 беспилотни летала и седум ракети. Украинската противвоздушна одбрана соборила или неутрализирала 139 дронови, но дел од нападот ја пробил одбраната: 20 беспилотни летала и пет балистички ракети погодиле цели на 15 локации. Ниту една од петте балистички ракети не била пресретната, што уште еднаш ја потврдува критичната потреба од современи противбалистички системи и дополнителни пресретнувачи.
Во Кијив, ова беше трет руски воздушен напад за помалку од една недела. Во главниот град одекнуваа силни експлозии, беа пријавени пожари во повеќе реони, а оштетени се згради, трамваи, гаражен комплекс и друга цивилна инфраструктура. Локалните власти соопштија дека во нападот загинала една жена, а има и повредени.
Особено тешка беше состојбата во Харкив, каде руските удари однесоа најмалку два човечки животи, а околу 20 лица беа повредени. Погодени се станбени објекти и црква, што повторно ја покажува реалноста на рускиот терор насочен кон цивилни, додека Москва продолжува да тврди дека напаѓа воени објекти.
Во Запорижја, украинските власти пријавија нови експлозии и повредени цивили. Чернигивската област, исто така, беше меѓу регионите погодени во масовниот напад, според објавата на амбасадорката Дир и украинските известувања. Деталите за штетите и бројот на повредени во дел од регионите сè уште се ажурираат.
Последниот напад доаѓа по серија масовни руски удари врз Кијив и други украински градови од почетокот на јули. Украинските податоци покажуваат дека балистичките ракети остануваат најголемиот предизвик за противвоздушната одбрана. Во услови кога само мал дел од балистичките ракети биле пресретнати во последните напади, Кијив повторно бара повеќе системи Patriot, дополнителни ракети-пресретнувачи и забрзано развивање на противбалистички капацитети со партнерите.
Украинските официјални претставници нагласуваат дека овие напади не се изолирани инциденти, туку дел од систематски руски терор врз цивилното население. Целта е да се исцрпи украинското општество, да се уништи инфраструктурата и да се создаде притисок врз меѓународната поддршка за Украина. Но пораката од Кијив останува непроменета: секој навремено испорачан систем за ПВО значи спасени животи.
Нападите се случуваат во момент кога во Анкара се одржува Самитот на НАТО, на кој Украина и безбедноста на Европа се меѓу клучните теми. Украинскиот претседател Володимир Зеленски се очекува да ја искористи средбата со сојузниците за да побара конкретна и забрзана поддршка за украинската воздушна одбрана, особено за пресретнувачи и системи способни да одговорат на балистичките закани.
На Самитот во Анкара, Зеленски порача дека Украина не е товар за НАТО, туку стратешка предност за Алијансата. Украинската армија, борбеното искуство, одбранбената индустрија и развојот на дронските технологии, според Кијив, веќе придонесуваат за безбедноста на Европа. Но токму последните руски напади покажуваат дека оваа отпорност мора да биде поддржана со навремени одлуки од партнерите.
Во овој контекст, барањето за ПВО не е само украинско воено барање. Тоа е барање за заштита на цивилите, на градовите, на енергетската и транспортната инфраструктура, но и на европската безбедносна архитектура. Секое одложување значи нов ризик за цивилното население и нова можност за Русија да продолжи со теророт.
Денешниот напад уште еднаш ја потврди главната порака на Украина: осудата не е доволна. Потребни се брзи одлуки, конкретна испорака на системи за противвоздушна одбрана, построги санкции против руската воена економија и континуиран меѓународен притисок врз Москва.
Агресорот продолжува да ја користи ноќта како оружје против украинските градови. Украина, пак, продолжува да се брани и да потсетува дека секој систем за ПВО испорачан навреме значи спасени животи.
Џ. Д.
