Повеќе од две години по францускиот предлог, спорот меѓу Софија и Скопје повторно се актуализира околу тоа дали техничките уставни измени можат да бидат придружени со политички гаранции од ЕУ. Додека од бугарска страна се инсистира дека договорената европска рамка не смее да се менува или дополнува со нови политички толкувања, ЕУ поракате е дека ниту една држава досега не добила гаранција дека ќе стане членка,
Според бугарската потпретседателка Илијана Јотова, европскиот компромис од 2022 година е единствената основа за продолжување на преговорите. Таа оценува дека барањата за политички декларации или дополнителни гаранции не треба да се поврзуваат со техничките обврски што произлегуваат од преговарачката рамка, бидејќи тоа би значело отворање на веќе затворени договори. Според Јотова, Бугарија останува на ставот дека внесувањето на Бугарите во Уставот е преземена обврска на Северна Македонија и дека процесот треба да се одвива според веќе усвоените европски документи.
Од друга страна, еврокомесарката за проширување Марта Кос признава дека постои чувство на разочараност во земјата поради долгото чекање на почетокот на преговорите. Во интервју за МИА таа истакнува дека разбира зошто македонските граѓани бараат поголема извесност, но нагласува дека ЕУ не може однапред да гарантира членство на ниту една држава-кандидат. Кос потсетува дека успехот на преговорите зависи од исполнувањето на критериумите, а не од политички ветувања.
Во исто време, таа прави разлика меѓу Северна Македонија и другите кандидати, оценувајќи дека Украина и Молдавија заслужено ги започнале преговорите поради спроведените реформи и исполнетите услови, отфрлајќи ги оценките дека нивниот напредок е исклучиво резултат на геополитичките околности.
Пораките од Софија и Брисел покажуваат дека, иако постои свесност за политичката чувствителност на процесот, нема подготвеност за промена на преговарачката рамка. Додека Бугарија инсистира на строго почитување на договорените услови без дополнителни политички интерпретации, Европската комисија испраќа сигнал дека разбирањето за македонските очекувања не значи и можност за формални гаранции за членство.
Б. Ј.
Во ера на дезинформации, националистички популизам и авторитаризам, неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
