Претседателот Стево Пендаровски денеска ја прими во проштална средба амбасадорката на Сојузна Република Германија во нашата земја, Анке Холштајн, соопшти претседателскиот кабинет.
На средбата претседателот Пендаровски се заблагодари за севкупниот дипломатски ангажман на амбасадорката Холштајн во унапредување на партнерските односи меѓу Германија и Северна Македонија и изрази уверување дека двете земји ќе продолжат да го развиваат пријателството.
Во таа насока, претседателот изрази задоволство од неодамнешната посета на германскиот претседател Штајнмајер и посветеноста на Германија на нашиот регион, како и уверување дека интензивниот политички дијалог, економската и трговската соработка ќе продолжат и во иднина.
На средбата со амбасадорката, шефот на државата се заблагодари за севкупната поддршка од Германија во однос на евроинтеграциските процеси на нашата земја како и во спроведувањето на неопходните суштински реформи во однос на изградба на правната држава и борбата со организираниот криминал и корупција.
Претседателот Пендаровски ја поздрави конструктивната соработка на германската амбасадорка со македонските институции и ѝ посака успех на Холштајн во натамошната кариера, соопшти кабинетот на претседателот.
