„Ова не е Уставен суд, ова е експозитура на злосторничко здружение, овие се џелати на правдата. Да се носи таква одлука, во момент кога е јасно дека со фалисификати се одржуваат власт, тоа е вистинска срамота. Мислам дека повеќе луѓе мора да протестираат, да се соберат и да им кажат на овие апаши во Република Македонија дека не може на овој начин да се управува“, изјави денес пред Уставниот суд, еден од учесниците на протестот ексгувернерот на НБРМ, Петар Гошев.
Повеќе стотици револтирани граѓани со транспаренти, свирчиња и тоалетни хартии протестираа пред Уставниот суд и скандираа барања за оставки на судиите Јован Јосифовски, Владимир Стојановски, Вангелина Маркудова, Елена Гошева и Никола Ивановски, кои како мнозинство ги надгласаа колегите-судии и ја прифатија иницијативата за разгледување на Законот за помилување, со која, судот во следната фаза може да одлучи да ги зголеми ингеренциите на претседателот на државата за помилување и на лица осудени за изборен криминал. Граѓаните извикуваа и: „Нема правда – нема мир!“, “Оставка за џелатите на Уставот!”,” Излезете да се видиме”, „Ова нема да ви помине“ …
Протестот кој беше следен од силен полициски кордон, беше мирен. На него говореа активистите од Платформата за граѓанска политика – АЈДЕ, Жарко Трајановски, Петрит Сарачини, Александар Дојранлиев и Симона Спировска.
Според Уранија Пировска, извршна директорка на Хелсиншкиот комитет за човековио права на Македонија, одлуката на судиите не е случајност: „Со оваа одлука на судот, и доколку понатаму, Законот за помилување од 2009 година се укине, се отвара простор за сите оние кои што ќе направат изборен криминал, понатаму да бидат амнестирани од претседателот. И Комисијата за помилување е утврдена токму со овој закон од 2009, ако се укине овој закон, може да се случи да се укине и оваа Комисија. Тоа значи дека само претседателот ќе одлучува кој ќе биде помилуван… Тоа значи дека сите оние кои гласаа со фалсификат лични карти, кои носеа луѓе од Пустец, кои правеа изборен криминал и за тоа се подготвуваат и за следните избори, ќе има можност да бидат помилувани од претседателот!“
[youtube width=”600″ height=”400″]https://www.youtube.com/watch?v=g7raKKm6_jI[/youtube]
Подносител на Иницијативата е Ристо Китевски, охридски адвокат-соработник во канцеларијата на Љубчо Наумовски, еден од адвокатите на Гордана Јанкулоска и Едмонд Темелко, осомничени за злосторничко здружување и изборен фалсификат во случајот „Титаник“.
Но, според Гошев, „не може со секојдневни лаги, со поттикнување меѓуетнички конфликти да се опстојува на власт. Тие ги рушат темелите на Република Македонија. Овие луѓе што го претставуваат Уставниот суд треба да се срамат, и нив ќе има заврши функцијата и треба да се запрашаат што ќе се слуши со нивните деца и нивните внуци“.
Според активистот Трајановски, „Уставниот суд треба да ја штити поделбата на власта, а не да ја укинува со брзина на светлината. Никогаш во историјата на Уставниот суд не била толку бргу распоредена некоја иницијатива. Никогаш во историјата, Владата и Собранието не одговориле толку бргу на Иницијатива на суд. Никогаш во историјата некоја Иницијатива не била ставена како точка на дневен ред пред Уставниот суд. Сето ова укажува дека на злосторничкото здружение за изборен криминал, многу му се брза да обезбеди амнестија“
