Новиот израелски ултранационалистички министер за национална безбедност, Итамар Бен-Гвир, вчера направи кратка и провокативна посета на светото место во Ерусалим, свето и за Евреите и за муслиманите, пркосејќи им на заканите за последици од милитантната група Хамас и предизвикувајќи бурна реакција од палестинските лидери и осуди од арапскиот свет, пренесува Њу Јорк Тајмс.
Местото е почитувано од Евреите како Планината на храмот, локацијата на два антички храма, а од муслиманите како Благородното светилиште, кое ја содржи џамијата Ал Акса и други важни исламски светилишта. Палестинците, и многу други муслимани во регионот, ги гледаат ваквите посети на израелските политичари како дел од обидот да се промени статусот на локацијата и да им се дадат повеќе права на еврејските верници таму.
Посетата на Бен-Гвир, која траеше помалку од 15 минути и се одржа под силно обезбедување, беше прва по неколку години на толку висок израелски функционер и помина без инциденти. Тоа претставува ран показател за бескомпромисниот пристап што новата израелска влада, најдесничарска и најрелигиозно конзервативна досега, го има кон Палестинците.
Додека беше на локацијата, Бен-Гвир се осврна на Хамас, исламската милитантна група која ја контролира Газа, велејќи:
„Израелската влада нема да се предаде на убиствена организација, гнасна терористичка организација“. изјави тој: „Планината на храмот е најважното место во светот за еврејскиот народ. Таа е отворена за сите“.
Подготви: Д. Мишев