ПРАШАЊЕ НА ДЕНОТ: Кој и зошто ја држи земјава во ЕУ чекалната – Брисел, Софија или нашата власт? предизвика бројни реакции кај граѓаните, кои понудија различни, често спротивставени гледишта за причините поради кои Северна Македонија и понатаму тапка во место на европскиот пат.
Дел од граѓаните вината ја гледаат во актуелната власт и нејзината политика.
„Очигледно и јасно ко ден – Владата на чело со Мицкоски“, коментира еден граѓанин, додека друг оценува дека „ВМРО, како и секогаш кога е на власт, носи стагнација, особено во меѓународната политика и изолација“.
Други, пак, потсетуваат дека проблемите не започнале со сегашната влада. „Прашањето треба да биде кој ја стави Македонија во оваа ситуација. Има причина зошто сме тука. Треба јавно да се покаже кој што направил, какви договори потпишал и граѓаните демократски да одлучат што понатаму“, наведува еден од учесниците во дебатата.
Значителен број коментари ја посочуваат Бугарија како главна пречка за македонските евроинтеграции.
„ЕУ и Софија – јасно како бел ден“, пишува еден граѓанин, додека друг смета дека „штетните договори со Грција и Бугарија ја доведоа државата во оваа позиција“.
Има и такви кои одговорноста ја лоцираат во самата Европска Унија. Според нив, Брисел нема искрена намера да ја прими Македонија во членство.
„ЕУ не ја сака Македонија за членка, ја сака само територијата на Македонија, без Македонци“, гласи еден од поострите коментари.
Некои граѓани сметаат дека одговорноста е поделена меѓу повеќе фактори. „Сите заедно – Брисел, Софија и нашите политичари“, пишува еден учесник во дискусијата, додека друг оценува дека и ВМРО-ДПМНЕ и СДСМ со години ги разочаруваат граѓаните и немаат вистински интерес земјата да напредува кон ЕУ.
Во дел од реакциите се забележува и поширока геополитичка перспектива. Според еден коментатор, конечниот исход на македонските евроинтеграции не зависи само од Брисел и Софија, туку и од пошироките европски и регионални односи, во кои улога играат Париз, Берлин, Лондон, Атина, Белград, Кијив и Москва.
Реакциите покажуваат дека јавноста останува длабоко поделена околу причините за застојот на европскиот пат. Додека едни вината ја гледаат во домашните политички елити, други ја посочуваат Бугарија, а трети сметаат дека проблемот лежи во самата Европска Унија. Заедничко за повеќето коментари е чувството на разочараност од долгогодишниот процес кој, и покрај бројните отстапки и политички компромиси, сè уште не донел конкретен напредок кон членството во ЕУ.
ЦИВИЛ ги повикува сите учесници во јавната дебата под ПРАШАЊЕ на ДЕНОТ да се воздржат од навреди, дискриминаторски изрази, говор на омраза и лични дисквалификации. Различните ставови и критики се добредојдени и се важен дел од демократскиот дијалог, но тие треба да бидат изразени на достоинствен, аргументиран и почитувачки начин.
ЦИВИЛ останува посветен на промовирање култура на дијалог, почитување на човековите права и ненасилна комуникација во јавниот простор.
Б. Ј.
