Иницијативата за референдум на Христијан Мицкоски е против македонскиот јазик, прави штета на идентитетот и насочена е директно против евроинтеграцијата на државата, тврдат од СДСМ откако опозициската ВМРО-ДПМНЕ поднесе потписи до Собранието со барање да се укине договорот од 2017 година со Бугарија.
-Сите официјални институции на Унијата потврдија дека процесот на преговори за членство го водиме како Македонци со заштитен македонски идентитет, со чиста формулација на македонскиот јазик. Но, Мицкоски по секоја цена дејствува антиевропски и на штета на државните и националните интереси, без било какво чувство за државност, своите политики ги води според личните потреби и интереси.
Мицкоски со референдумот има за цел да си ја спаси разнишаната фотелја во Белиот дворец, бидејќи и истакнати членови на ВМРО-ДПМНЕ не се сложуваат со него. Со иницијативата за референдум, со активните и пасивните блокади Мицкоски сака да го попречи нормалното функционирање на државата, во време на економска и енергетска криза, работи на штета на граѓаните и на компаниите.Но граѓаните го прочитаа, доста им е од деструктивните и ретроградните политики на Мицкоски и на ВМРО-ДПМНЕ, што јасно им го порачаа на вонредните локалните избори. Мицкоски останува изолиран, а неговите деструкции повторно ќе бидат поразени, реагираат од владеечката партија СДСМ.
