Во контекст на најновите збиднувања на политичката сцена во Северна Македонија и претстојните настани и посети на високи државни претставници на меѓународната заедница, разговаравме со новинарот и колумнист Ерол Ризаов.
На прашањето за коментар за средбата Ковачевски – Заев – Ахмети, Ризаов во ексклузивната изјава за ЦИВИЛ МЕДИА вели дека сите средби меѓу политичките лидери/партии кои се случуваат, не само пред избори, туку воопшто, во кои се разговара и се прават напори да се изнајде решение за уставните измени и продолжување на патот кон ЕУ е благонаклонето и корисно и такви средби треба да се случуваат.
„Меѓутоа, не очекувам дека ќе се направи меѓупартиски консензус пред избори, но исто така можно е да нема консензус и по изборите. Коалицијата која е за ЕУ ако победи на избори ќе мора да бара консензус од опозицијата за уставните измени, и обратно, доколку победи ВМРО-ДПМНЕ ќе мора да бара консензус од опозицијата“, вели Ризаов.
Тој додава дека, според анкетите, најверојатно е дека ниту една коалиција нема да има 80 пратеници за да може да се изгласаат уставните измени, што значи дека може да ја доведе Македонија во деликатна криза од која нема излез.
„За жал политичките битки кај нас се водат за доаѓање на власт, па дури потоа ќе се размислува за влез во ЕУ. Тоа е лошо. А исто така нереално е неизвесноста на ВМРО-ДПМНЕ околу уставните измени. ВМРО-ДПМНЕ доколку победи на избори ќе направи пропаганда и со одредени козметички измени ќе води кампања дека тие успаеале да направат подобар договор за уставните измени, и да ги изгласаат, меѓутоа граѓаните треба да знаат дека ниту може, ниту ќе направат подобра преговарачка рамка“, заклучува Ризаов, додавајќи дека тоа е веќе завршен процес.
Тој потенцира дека никој не гарантира дека ќе имаме подобра позиција и преговарачка рамка, бидејќи може да се смени геополитичката состојба и Македонија да остане во Западен Балкан со еден или два соседи кои нема да се дел од европското семејство.
„Македонија ќе влезе во дестабилизација доколку неколку соседни земји влезат во ЕУ. Ако сега нашите граѓани извадиле околу 100.000 бугарски пасоши поради заминување во европските земји, пред се за работа, тогаш, колку наши граѓани ќе извадат српски, албански или црногорски пасоши? Тоа треба да се зпрашаат политичарите“, вели Ризаов.
Тој вели дека претставниците на меѓународната заедница ќе бараат гаранции од релевантните и поголеми политичките партии и институции дека по изборите ќе го продолжат евроатлантскиот пат на земјата. Ризаов додава дека доаѓањето во земјава на помошник државниот секретар на САД за европски и евроазиски прашања, Џејмс О’Брајан, е токму тоа, дека тој ќе бара гаранции од политичките партии или коалиции дека нема да скршнат од евроатлантскиот пат.
Дехран Муратов
