пишува: Сашо Орданоски
[dropcap]Е[/dropcap]дна од последиците од ваквата убедлива победа на СДСМ на локалниве избори е фактот што, во политичка и психолошка смисла, сега тие ја „поседуваат“ одлуката за распуштање на Собранието и за евентуално одење на нови парламентарни избори. Тоа наскоро ќе биде така и во математичка смисла, бидејќи за очекување е дека десетина пратеници од опозиционата коалиција на ВМРО-ДПМНЕ ќе покажат желба за промена на „дресот“ и за збогување со губитникот Груевски.
Нема со такви идеи да излезат само оние пратеници кои не се членови на ДПМНЕ, туку од расплетот на „анализите“ и „синтезите“ што во една марксистичка дијалектичка смисла ги најави Груевски – за да може да се оцени влијанието на гео-термалните води и сончевите мени врз тектонската промена на расположението на бирачите во Македонија – ќе зависи и однесувањето на добар дел од пратениците на оваа партија кон својата матична припадност во Собранието.
Но, не заборавајте, уште не сме расчистиле со „митот за мениците“ за пратениците на Груевски, односно со тоа дали Фамилијата, како секоја пристојна мафијашка организација, освен со политички средства, лојалноста на пратениците кон себе не ја обезбедила и со некаква материјална „омерта“, односно со дебели банкарски гаранции за да не мора, баш во вакви ситуации како сегашнава, да се заебава со моралните и политичките светогледи на секое поединечно грло од своите „овци“ во собраниското партиско „трло“.
„Е, па, слободата си има своја цена, да видиме кој ќе биде подготвен да ја плати!“, ми вели еден загреан реформист од таа партија кој најавува јавна иницијатива до надлежното обвинителство за тоа да ги провери индициите за ваквата нелегална банкарско-гаранциска пракса во ДПМНЕ. Во таа партија, очигледно, нема да се оди на мирнодопско примопредавање на власта, а сега ќе се провери и дали димензиите на лифтовите и на тајните подземни ходници под главното партиско седиште – тој иден дониран репрезентативен студентски дом – во центарот на Скопје се планирани адекватно на димензиите на партискиот сеф што треба да се изманеврира и да се пренесе на „резервна“ груевистичка локација. Којзнае колку валкани тајни (оти, пари таму нема да се најдат) содржи таа „последна линија на одбраната“ на Фамилијата од бунтот во сопствените редови.
Што е право, Заев јасно стави на знаење дека во догледна иднина не планира да го распушта Собранието и да оди на избори, бидејќи на Македонија ѝ е крајно време нешто да почне и да работи, а не само да се занимава со политика од сабајле до вечер, 365 дена во годината. Колку за илустрација: списокот за неопходни реформи во државава е подолг од списокот на станови и деловни простори што ги поседуваат градоначалниците во заминување, па самото тоа ви кажува кој е респектибилниот обем на работата што нѐ очекува!
Сепак, за дефинитивни заклучоци за истрајноста на политичката стабилност на Македонија по локалниве избори препорачливо е да се дочека и новиот градоначалнички расплет меѓу албанските партии. Тоа во голема мера ќе ја одреди среднорочната политичка судбина на БЕСА, на димензиите на суетата на Зијадин Села и на позициите на Али Ахмети кон фракциите во сопствената партија. И таа „вреќа со рогови“ ќе треба Заев некако да ја менаџира, ако сака да обезбеди релативна стабилност на својата влада за предизвиците што нѐ очекуваат.
Пусти Заев, што му беше едноставно додека беше во опозиција: Грујо си беше надлежен за сѐ, а Заев само за неговото уривање. Оди сега фати му го крајот!
Преземањето на оваа содржина е дозволено само по 11 часот, на денот на објавувањето. Потоа, важат вообичаените правила според лиценцата Creative Commons 1.0.